மாருதி விட்டாரா பிரிஸ்ஸா பெட்ரோல்
ஆட்டோ எக்ஸ்போவில் பலருடைய எதிர்பார்ப்புக்கு மத்தியில் பார்வைக்கு கொண்டுவரப்பட்ட கார் மாருதி விட்டாரா பிரிஸ்ஸா எஸ்யூவி. தற்போது இந்த கார் டீசல் எஞ்சின் தேர்வில் விற்பனை செய்யப்பட்டு வருகிறது. புதியதாக அறிமுகம் செய்யப்பட்டுள்ள காரில் 1.5 லிட்டர் பெட்ரோல் எஞ்சின் தேர்வு மட்டுமே வழங்கப்பட்டுள்ளது. மேனுவல் மற்றும் ஆட்டோமேட்டிக் கியர்பாக்ஸ் தேர்வுகள் கொண்டுள்ள இந்த கார் வாடிக்கையாளர்களிடம் நிச்சயம் வரவேற்பு பெறும் என மாருதி நம்பிக்கை தெரிவித்துள்ளது. இந்த புதிய மாருதி விட்டாரா பிரிஸ்ஸா பெட்ரோல் கார் இம்மாத இறுதியில் விற்பனைக்கு கொண்டுவரப்படவுள்ளது.
மாருதி இக்னிஸ் ஃபேஸ்லிஃப்ட்
மாருதி சுஸுகி நிறுவனம் புதியதாக தயாரித்துள்ள இக்னிஸ் ஃபேஸ்லிஃப்ட் காரும் 2020 ஆட்டோ எக்ஸ்போவில் அறிமுகம் செய்யப்பட்டது. பிஎஸ்-6 தரத்திலான 1.2 லிட்டர் பெட்ரோல் எஞ்சின் கொண்டுள்ள இந்த காரில், புதியதாக 7 அங்குலத்தில் தொடுதிரை கொண்ட இன்ஃபொடெயின்மென்ட் சிஸ்டம் வழங்கப்பட்டுள்ளது. மிக விரைவில் விற்பனைக்கு கொண்டுவரப்படவுள்ள இந்த கார் மேனுவல் கியர்பாக்ஸ் அல்லது ஏஎம்டி கியர்பாக்ஸ் தேர்வுகளில் விற்பனைக்கு கிடைக்கும்.
எம்.ஜி. ஹெக்டர் பிளஸ்
கடந்தாண்டு இந்தியாவில் கால்பதித்து வெற்றி வாகை சூட்டியுள்ள எம்.ஜி. மோட்டார்ஸ், தனது முதல் ஹெக்டர் எஸ்யூவி காரை தொடர்ந்து, அதனுடைய விரிவாக்கப்பட்ட ஹெக்டர் பிளஸ் காரை விற்பனைக்கு கொண்டுவரவுள்ளது. முன்னதாக, இந்த காருக்கான அறிமுகம் 2020 ஆட்டோ எக்ஸ்போவில் நடைபெற்றது. பார்ப்பதற்கு தற்போதைய ஹெக்டர் காரைப் போலவே காட்சியளிக்கிறது. எனினும், இந்த கார் 6 சீட்டர் மற்றும் 7 சீட்டர் மாடல்களில் அறிமுகம் செய்யப்பட்டுள்ளது. ஹெக்டர் காரிலுள்ள தே 1.5 லிட்டர் பெட்ரோல் மற்றும் 2.0 டீசல் எஞ்சின் தேர்வுகள் இந்த காருக்கு வழங்கப்பட்டுள்ளன. இதற்கு ரூ. 14 லட்சம் ஆரம்ப விலையாக நிர்ணயம் செய்யப்படலாம் என எதிர்பார்க்கப்படுகிறது.
ஸ்கோடா ரேபிட் பிஎஸ்-6
இந்த ஆட்டோ எக்ஸ்போவில் ஸ்கோடா நிறுவனம் ஆச்சரிய அறிமுகம் அளித்த மாடல் தான் ரேபிட் பிஎஸ்-6. புதிய 1.0 லிட்டர் டர்போ பெட்ரோல் எஞ்சின் கொண்ட இந்த கார் 115 பிஎச்பி பவர் மற்றும் 200 என்.எம் டார்க் திறனை அதிகப்பட்சமாக வழங்கும். இந்த கார் இனிமேல் டீசல் எஞ்சினில் விற்பனைக்கு கிடைக்கப்படமாட்டாது என ஸ்கோடா நிறுவனம் தெரிவித்துள்ளது. இதற்கிடையில் புதிய ரேபிட் பிஎஸ்-6 கார் ஆறு ஸ்பீடு மேனுவல் கியர்பாக்ஸ் அல்லது டிஎஸ்ஜி ஆட்டோமேட்டிக் கியர்பாக்ஸ் தேர்வில் விற்பனைக்கு கிடைக்கும்.