வேகன் ஆர் காருடன் குஷியில் குத்தாட்டம் போடும் மாருதி சுஸுகி- ஏன் தெரியுமா..?

நகரப்புறங்களுக்கு ஏற்றவாறான கட்டமைப்பை பெற்றுள்ள மாருதி சுஸுகி வேகன் ஆர் கார், கடந்த 2018 நவம்பர் மாத விற்பனையை விட, கடந்த மாதத்தில் 29.5 சதவீதம் அதிக விற்பனையை எட்டி மைல்கல் சாதனையை பதிவு செய்துள்ளது.

பட்ஜெட் ரகத்தில் கார்களை எதிர்நோக்குபவர்களுக்கும், உயரமானவர்களுக்கும் முதல் தேர்வாக இருக்கும் மாடல்களில் முதன்மையான காராக உள்ளது மாருதி சுஸுகி வேகன் ஆர். அதிக ஹெட்ரூம் வசதியை வழங்கும் இந்த கார், அடக்கமான வடிவத்தில், முக்கிய சிறப்பம்சங்களை பெற்றுள்ளது.

இதனால் இந்த காரை விரும்பி வாங்க பலரும் ஆர்வம் காட்டுகின்றனர். இதன்மூலம் நாட்டில் விற்பனையாகவும் சிறியரக கார்களில் அதிக விற்பனை திறனை கொண்ட 5வது மாடலாக விளங்குகிறது மாருதி சுஸுகி வேகன் ஆர்.

தொடர்ந்து கிடைத்து வரும் வரவேற்பின் காரணமாக, மாருதி சுஸுகி வேகன் ஆர் காரை அவ்வப்போது அப்டேட் செய்து வெளியிட மாருதி சுஸுகி தவறுவதே கிடையாது. அந்த வகையில், இதனுடைய சமீபத்திய அப்டேடட் வர்ஷன் கடந்த 2019 ஜனவரி மாதம் விற்பனைக்கு அறிமுகமானது.

முற்றிலும் புதிய தாத்பரியங்களுடன் தயாராகி இருந்த அந்த காரில் 1.0 லிட்டர் பெட்ரோல் எஞ்சின் மற்றும் 1.2 லிட்டர் பெட்ரோல் எஞ்சின் தேர்வுகள் இடம்பெற்றுள்ளன. வாடிக்கையாளர்களின் தேர்வுக்கு ஏற்றவாறு மேனுவல் மற்றும் ஏஎம்டி கியர்பாக்ஸ் தேர்வுகளில் புதிய வேகன் ஆர் கார் விற்பனை செய்யப்பட்டு வருகிறது.

இந்த கார் விற்பனைக்கு வந்து ஓராண்டை நிறைவு செய்யவுள்ள நிலையில், புதிய தலைமுறை வேகன் ஆர் காரினுடைய விற்பனை ஒரு லட்சத்தை கடந்துள்ளதாக மாருதி சுஸுகி தெரிவித்துள்ளது.

கடந்த நவம்பர் மாதத்தில் 1,03,325 யூனிட் வேகன் ஆர் கார்கள் விற்பனை செய்யப்பட்டுள்ளன. அதன்படி, கடந்த மாதம் மட்டும் 14,650 யூனிட் கார்கள் விற்பனை செய்யப்பட்டுள்ளன. இதை கடந்த 2018 நவம்பர் மாத விற்பனையுடன் ஒப்பிடுகையில், நடப்பாண்டு நவம்பரில் 29.5 சதவீத விற்பனை வளர்ச்சியை வேகன் ஆர் பதிவு செய்துள்ளது.

தொடர்ந்து வேகன் ஆர் மாடலுக்கு நிலவி வரும் டிமாண்ட் காரணமாக இந்த விற்பனை இலக்கை அந்த மாடல் அடைந்துள்ளது. புதிய தலைமுறை வேகன் ஆர் காரில் டூயல் நிற இண்டீரியர் தீம் உள்ளது. இதனுடைய 1.0 லிட்டர் பெட்ரோல் மாடல் 67 பிஎச்பி பவர் மற்றும் 90 என்.எம் டார்க் திறனை வெளிப்படுத்தும்.

மேலும், புதிய தலைமுறை வேகன் ஆர் காரில் 1.2 லிட்டர் மாடல் 82 பிஎச்பி பவர் மற்றும் 113 என்.எம் டார்க் திறனை அதிகப்பட்சமாக வழங்கும். வாடிக்கையாளர்களின் தேர்வுகளுக்கு ஏற்றவாறு இந்த கார், 5 ஸ்பீடு மேனுவல் அல்லது ஏஎம்டி கியர்பாக்ஸ் ஆப்ஷனில் விற்பனைக்கு கிடைக்கிறது.

புதிய தலைமுறை வேகன் ஆர் கார் இரண்டு பெட்ரோல் மாடல்களில் விற்பனைக்கு கிடைக்கிறது. அதன்படி இதனுடைய 1.0 லிட்டர் பெட்ரோல் மாடலுக்கு ரூ. 4.42 லட்சம் விலை நிர்ணயம் செய்யப்பட்டுள்ளது. இதனுடைய 1.2 லிட்டர் பெட்ரோல் ரூ. 5.91 லட்சம் விலை பெறுகிறது.

இவ்விரண்டு மாடல்களின் விலை எக்ஸ்-ஷோரூம், இந்திய மதிப்பில் வழங்கப்பட்டுள்ளது. மாருதி சுஸுகி வேகன் ஆர் மாடலை சிஎன்ஜி மாடலிலும் விற்பனை செய்கிறது. அதற்கு ரூ. 4.99 லட்சம் (எக்ஸ்-ஷோரூம், இந்தியா) விலை நிர்ணயம் செய்யப்பட்டுள்ளது. இந்தியாவில் இந்த கார் டாடா டியாகோ மாடலுக்கு சரிநிகர் போட்டியாக உள்ளது.