அப்படியென்ன ஸ்பெஷல்; ரூ.5.49 லட்சத்தில் அறிமுகமான 2019 கவாசாகி நிஞ்ஜா 650!

நியூ டெல்லி: ஜப்பானிய பைக் தயாரிப்பு நிறுவனமான கவாசாகி, 2019ஆம் ஆண்டு மாடல் நிஞ்ஜா 650ஐ அறிமுகம் செய்துள்ளது.

இந்தியாவில் இதன் அறிமுக விலை ரூ.5.49 லட்சம் ஆகும். இந்த மாடல் கருப்பு நிறத்தில், தற்போதைய நீல மற்றும் கேஆர்டி எடிசன் தீமில் விற்பனைக்கு வருகிறது. கவாசாகி நிஞ்ஜாவைத் தொடர்ந்து, 2019ல் பல்வேறு பைக் மாடல்களை இந்தியாவில் அறிமுகம் செய்ய கவாசாகி நிறுவனம் திட்டமிட்டுள்ளது.

அந்நிறுவன தயாரிப்புகளில் 650 சிசி திறனில், 4 வெவ்வேறு விதமான பைக்குகள் இருக்கின்றன. அதில் ஒன்று நிஞ்ஜா 650ம் ஒன்று என்பது குறிப்பிடத்தக்கது. நிஞ்ஜா 650 மாடலுக்கு இந்தியாவில் அதிக எதிர்பார்ப்பு இருப்பதை உணர்ந்து, அட்டகாசமான விலையில் அறிமுகம் செய்யப்பட்டுள்ளது.

பிற மாடல் பைக்குகளைப் போல், மெட்டாலிக் ஸ்பார்க் கருப்பு வண்ணத்தில் ஆன நிஞ்ஜா 650யும் மிகப்பெரிய வெற்றி பெறும் என நம்புவதாக இந்திய கவாசாகி மோட்டார்ஸ் நிர்வாக இயக்குநர் யுடாகா யமாஷிடா கூறியுள்ளார். 2019 நிஞ்ஜா 650 மாடலில், புதிய மெட்டாலிக் கருப்பு வண்ண வசதியைத் தவிர, வேறு காஸ்மெடிக் அல்லது மெக்கானிக்கல் மாற்றங்கள் ஏதும் இல்லை.

68PS ஆற்றல், 65.7 Nm டர்க்யூ திறன், 649 சிசி, லிக்யூடு கூல்டு, பேரலல் டுவின் சிலிண்டர் எஞ்சின் பெற்றுள்ளது. இதில் 6 ஸ்பீட் கியர் பாக்ஸ் உடன் ஸ்லிப்பர் க்ளட்ச்சும் இருக்கிறது. இந்த பைக்கில் ஏபிஎஸ்(ஆண்டி-லாக் பிரேக்கிங் சிஸ்டம்) வசதியும் உள்ளது. ஹோண்டா CBR650F மாடல் பைக்கிற்கு, 2019 நிஞ்ஜா 650 மாடலும் போட்டியாக இருக்கும் என்று கூறப்படுகிறது.

2019 Kawasaki Ninja 650 launched at Rs 5.49 lakh.