டாமினார் 400 2019 மாடல்- ஒரு பார்வை

பஜாஜ் நிறுவனத்தின் அடுத்த பைக், 2019 பஜாஜ் டாமினார். இன்னும் சில வாரங்களில் இந்த பைக் விற்பனைக்கு வரவுள்ளது. அதற்கு முன்பே, இந்த பைக்கின் மெக்கானிக்கல் மற்றும் டெக்னிக்கல் விவரங்கள் ஆன்லைனில் வெளியாகியுள்ளது.

பழைய டாமினார் பைக்கில் 373.2 சிசி சிங்கிள் சிலிண்டர், லிக்விட் கூல்ட் இன்ஜின் இருந்தது. புது டாமினார் பைக்கில் மோட்டரில் மாற்றமில்லை. ஆனால், புது டாமினார் 8650 rpm இல் 39 bhp பவரை வெளிப்படுத்தும் எனத் தெரிகிறது. தற்போதைய டாமினார் 8000 rpm யில் 35 bhp பவரை வெளியிடுகிறது. புது டாமினார், 6 கியர் வசதியுடன் வருகிறது.

புது பைக்கில் உள்ள மாற்றங்களால், பைக்கின் எடையும் 2.5 கிலோ உயர்ந்துள்ளது. புது டாமினார் பைக்கின் எடை 184.5 கிலோவாகும். பிரேக் மாடலிலும் மாற்றம் செய்யப்பட்டுள்ளது. 390 டியூக் பைக்கில் இருக்கும் முன் பிரேக் தான் 2019 டாமினாரிலும் இருக்கிறது.

தற்போதைய டாமினாரின் சென்னை ஆன் ரோட் விலை 2 லட்சம். புது டாமினாரில் செய்யப்பட்டுள்ள மாற்றங்களால் 15,000 ரூபாய் வரை விலை உயர வாய்ப்புள்ளது. ஆனாலும் இது, டாமினாரின் போட்டியாக கருதப்படும் அட்வெஞ்சர் டூரர் பைக்குகளான கேடிஎம் டியூக் 250, ராயல் என்ஃபீல்ட் ஹிமாலயன், ஹோண்டா சிபி300ஆர் ஆகிய பைக்குகளின் விலையை விட குறைவாகும்.