வந்தாச்சு ஏபிஎஸ் வசதி; அதுவும் பஜாஜ் பைக்கின் 2 டாப் மாடல்களில் - வாங்க தெரிஞ்சுக்கலாம்!

இருசக்கர வாகனத் தயாரிப்பில் பஜாஜ் நிறுவனம் முன்னணியில் இருக்கிறது. இந்நிறுவனம் தனது பிரபல மாடல்களான அவெஞ்சர் ஸ்டிரீட், குரூயிஸ் 220 ஆகிய மாடல்களில் ஏபிஎஸ் வசதியை சேர்த்துள்ளது.

ஏனெனில் நடப்பாண்டு ஏப்ரல் 1ஆம் தேதி முதல், புதிதாக தயாரிக்கப்படும் இரு சக்கர வாகனங்களில் ஏபிஎஸ் அல்லது சிபிஎஸ் வசதி கட்டாயம் இருக்க வேண்டும் என்று அரசு உத்தரவிட்டுள்ளது.

இருப்பினும் குறிப்பிட்ட காலக்கெடுவிற்கு முன்பாக, பல்வேறு நிறுவனங்களும் ஏபிஎஸ் அல்லது சிபிஎஸ் வசதியை அறிமுகம் செய்து வருகின்றன. அதேசமயம் இந்த வசதிகள் இல்லாத மாடல்களின் தயாரிப்பு படிப்படியாக நிறுத்தப்பட்டு வருகிறது.

பஜாஜ் நிறுவனத்தின் ஏபிஎஸ் வசதி கொண்ட அவெஞ்சர் 220 மாடல் விலை ரூ.1.02 லட்சம் ஆகும். முன்னதாக ஏபிஎஸ் வசதி இல்லாத மாடலின் விலை ரூ.6,700 குறைவு என்பது குறிப்பிடத்தக்கது.

இதேபோல் ஏபிஎஸ் வசதி கொண்ட அவெஞ்சர் ஸ்டிரீட் மாடல் விலை ரூ.86,600 ஆகும். இதில் 180 சிசி திறன், ஒற்றை எஞ்சின், 15.5 hp திறனை 8,500 rpm வேகத்திலும், 13.7 Nm டார்க் இழுவிசை 6,500 rpm வேகத்திலும் வெளிப்படுத்தும்.

அவெஞ்சர் 220 மாடல் 220 சிசி திறன் கொண்டது. ஒற்றை சிலிண்டர் எஞ்சின், 19 hp திறனை 8,400 rpm வேகத்திலும், 17.5 Nm டார்க் இழுவிசையை 7,000 rpm வேகத்திலும் வெளிப்படுத்தக்கூடியது.