ஜி 310-ஆர், ஜி 310-ஜிஎஸ்; அசத்தலான புது மாடல் பைக்குகளை அறிமுகம் செய்த பி.எம்.டபிள்யூ!

டெல்லி: புது மாடல் பைக்குகளை பி.எம்.டபிள்யூ நிறுவனம் இந்தியாவில் அறிமுகம் செய்துள்ளது.

உலகளவில் கார் தயாரிப்பில் முன்னணியில் இருக்கும் நிறுவனங்களில் ஒன்று பி.எம்.டபிள்யூ. இந்தியாவிலும் கிளைகளை விரித்து, வாடிக்கையாளர்கள் மத்தியில் நல்ல வரவேற்பை பெற்று விளங்குகிறது. அதேசமயம் பைக்குகள் தயாரிப்பிலும் தீவிரம் காட்டி வருகிறது.

இந்நிலையில் ஜி310-ஆர் மற்றும் ஜி310-ஜிஎஸ் ஆகிய மாடல் பைக்குகளை பி.எம்.டபிள்யூ அறிமுகம் செய்துள்ளது. இதற்காக இந்திய இருசக்கர தயாரிப்பு நிறுவனமான டிவிஎஸ் உடன் கைகோர்த்துள்ளது. எனவே பி.எம்.டபிள்யூவின் புதிய மாடல் பைக்குகள், ஒசூரில் உள்ள டிவிஎஸ் தொழிற்சாலையில் தயாரிக்கப்படுகிறது.

இதன்மூலம் இந்தியாவிலேயே தயாரிக்கப்பட்ட பி.எம்.டபிள்யூ பைக்குகள் என்ற பெருமையை, இந்த இரு மாடல்களும் பெற்றுள்ளன. இந்த மாடல்கள் 313 சிசி லிக்யூடு கூல் எஞ்சின், 6 கியர்கள், 34 hp திறன், ஏபிஎஸ் வசதியோடு 5 ஸ்போக்ஸ் அலாய் வீல் கொண்டுள்ளன.

மேலும் ஸ்டைல் ஹெச்.பி, காஸ்மிக் பிளாக், ரேஸிங் ரெட் ஆகிய வண்ணங்களில் விற்பனைக்கு கிடைக்கிறது. இதன் விலை முறையே ரூ.2.99 லட்சம், ரூ.3.49 லட்சம் ஆகும். ஜெர்மனி, தாய்லாந்து, பிரேசிலைத் தொடர்ந்து, பி.எம்.டபிள்யூ பைக்குகள் தயாரிக்கும் நாடுகளின் பட்டியலில் இந்தியா இணைந்துள்ளது குறிப்பிடத்தக்கது.

BMW India introduces two new model bikes in affordable price.