சவால் நிறைந்த 827 கி.மீ பந்தயம்; பஜா உலக ரேஸிற்கு தேர்வான முதல் இந்தியப் பெண்!

நியூ டெல்லி: ஷெர்கோ டிவிஎஸ் ரேலி பேக்டரி அணி சார்பில் பஜா அராகான் போட்டிக்கு ஐஸ்வர்யா பிஸ்ஸாய் தேர்வாகியுள்ளார்.

இந்தப் பயணம் வரும் 20ஆம் தொடங்கி, ஜூலை 22ல் ஸ்பெயின் நாட்டின் டெருயிலில் நிறைவடைகிறது. கோடைக்கால உயர் வெப்பநிலையில் நடைபெறும் இந்தப் போட்டி, ரேஸில் ஈடுபடுபவர்களுக்கு சவால் நிறைந்ததாக இருக்கும். அதாவது ஜிலோகா, சியரா டி அல்பார்ராசின், குயென்காஸ் மினராஸ், டெருயில் கம்யூனிட்டி ஆகிய பகுதிகள் வழியாக செல்கின்றனர்.

இதற்காக பிரெஞ்ச் சகோதரர்கள் அட்ரியன் மெட்கே மற்றும் மைக்கேல் மெட்கே, ஸ்பானியாவின் லோரென்ஸோ சண்டோலினோ, இந்தியாவின் ஐஸ்வர்யா பிஸ்ஸாய் ஆகியோர் தேர்வு செய்யப்பட்டுள்ளனர். பஜா உலக ரேலியில் பங்கேற்கும் முதல் இந்தியப் பெண் ஐஸ்வர்யா என்பது குறிப்பிடத்தக்கது.

இந்தப் பயணத்தில் சிறப்பாக செயல்பட இந்த வாரத்தின் இறுதியில் ஐஸ்வர்யா ஸ்பெயின் புறப்பட்டுச் செல்கிறார். அங்கு RTR 450 ரேலி மோட்டார் சைக்கிளில் தனது அணியினருடன் பயிற்சி மேற்கொள்கிறார். இதுதொடர்பாக பேசிய ஐஸ்வர்யா, இது என்னுடைய முதல் சர்வதேச ரேலி. அனைத்து ரேஸ் பிரியர்களுக்கும் பஜா அராகான் சிறப்பான பயிற்சி களமாக இருக்கும்.

சர்வதேச அளவில் எங்கள் திறனை வளர்த்துக் கொள்ள உதவி செய்கிறது. மிகுந்த அனுபவமுள்ள சர்வதேச சாம்பியன்களுடன் ரேஸில் பங்கேற்பது மகிழ்ச்சியளிப்பதாக கூறினார்.

பெங்களூருவைச் சேர்ந்த 22 வயது இளம் ரேஸர் ஐஸ்வர்யா பிஸ்ஸாய். ரெய்ட் டி ஹிமாலயா, தக்‌ஷின் டரே, இந்திய தேசிய ரேலி சாம்பியன்ஷிப், டிவிஎஸ் அபாச்சி லேடீஸ் ஒன் மேக் சாம்பியன்ஷிப் உள்ளிட்ட பல்வேறு பட்டங்களை வென்றுள்ளார்.

Indian woman to compete in Baja World Rally.