இவ்வளவு கம்மி விலையில் ’டிவிஸ்’ பைக்கா? வந்தாச்சு ஸ்போர்ட் ஸ்பெஷல் எடிசன்!

சென்னையை தலைமையிடமாகக் கொண்டு செயல்படும் டிவிஎஸ் மோட்டார் நிறுவனம், கடந்த 25ஆம் தேதி சிறப்பு எடிசனாக டிவிஎஸ் ஸ்போர்ட் மோட்டார் சைக்கிளை அறிமுகம் செய்தது. இதனை பண்டிகை கால விற்பனையைக் கருத்தில் கொண்டு விற்பனைக்கு கொண்டு வந்துள்ளது.

இந்த மோட்டார் சைக்கிள் கிக் ஸ்டார்ட் அல்லாய் வீல் மற்றும் எலக்ட்ரிக் ஸ்டார்ட் என இருவகைகளில் கிடைக்கிறது. இதன் விலை ரூ.40,088ல் இருந்து தொடங்குகிறது. இந்த புதிய மாடலில் நீண்ட இருக்கை வசதி செய்து தரப்பட்டுள்ளது. மேலும் அகலமான உடல் கட்டமைப்பு அதிக வசதியை அளிக்கிறது.

இது அடிப்படை கருப்பு வண்ணத்துடன், ரெட் சில்வர் மற்றும் ப்ளூ சில்வர் அம்சங்களுடன் கிடைக்கிறது. இந்த மோட்டார் சைக்கிளில் 3டி லோகோ இடம்பெற்றுள்ளது. எஸ்.பி.டி எனப்படும் ஸிங்க்ரனைசுடு பிரேக்கிங் தொழில்நுட்பத்தை முக்கிய பாதுகாப்பு அம்சமாக சேர்க்கப்பட்டுள்ளது.

இதுகுறித்து பேசிய டிவிஎஸ் மோட்டார் நிறுவனத்தின் ஸ்கூட்டர் மற்றும் கார்ப்பரேட் பிராண்ட் பிரிவில் துணைத் தலைவர் அனிருத்தா ஹால்டன், டிவிஎஸ் ஸ்போர்ட் ஆனது 2 மில்லியன் வாடிக்கையாளர்களுக்கு அதிகபட்ச மைலேஜ், சிறந்த ஓட்டும் அனுபவம் உள்ளிட்ட அம்சங்களை 10 ஆண்டுகளுக்கும் மேலாக வழங்கி வருகிறது.

ஸ்பெஷல் எடிசன் டிவிஎஸ் ஸ்போர்ட் ஆனது ஸ்டைல் மற்றும் போதிய வசதி ஆகியவற்றை ஒருங்கிணைத்து அளிக்கிறது. இது வாடிக்கையாளர்களின் ஒட்டுமொத்த தேவையை பூர்த்தி செய்யும் என்று குறிப்பிட்டார்.

இந்த மோட்டார் சைக்கிள் 99.7 சிசி எஞ்சின், 7.5PS திறன், 95 கிமீ/லி எரிபொருள் திறன், கியர் எலக்ட்ரிக் ஸ்டார்ட், அலுமினியம் கிராப் ரயில், க்ரோம் மஃப்ளர் கார்ட் உள்ளிட்டவற்றை வழங்குகிறது.

டிவிஎஸ் ஸ்போர்ட் மோட்டார் சைக்கிள் 5 ஆண்டுகள் வாரண்டி, ஓராண்டு இலவச சொந்த வாகன சேதார இன்சூரன்ஸ், பே-டிம் கேஷ்பேக் சலுகைகளை அளிக்கிறது.

TVS Sport special edition launched at Rs 40,088.