இந்தப் பைக்குகளில் பிரச்சனை இருக்கு; திரும்ப கொடுத்திருங்க - யமஹா அறிவிப்பு!

இந்திய யமஹா மோட்டார் பிரைவேட் லிமிடெட் தனது 1,874 யமஹா YZR-R3 மோட்டார் சைக்கிள்களை திரும்பப் பெற முடிவு செய்துள்ளது. இதில் ரேடியேட்டர் ஹோஸ், ஸ்பிரிங் டார்ஷன் போன்ற பிரச்சனைகள் இருப்பதாக தெரிவித்துள்ளது.

இந்தப் பிரச்சனை குறிப்பிட்ட எண்ணிக்கையிலான பைக்குகளில் மட்டுமே இருப்பதாக கூறியுள்ளது. இதனால் இந்தப் பைக்குகள் திரும்ப அளிக்குமாறு கோரிக்கை விடுத்துள்ளது.

இருப்பினும் இதுகுறித்த புகார்கள் எதுவும் இந்தியாவில் வரவில்லை என்று யமஹா நிறுவனம் தெரிவித்துள்ளது. அதேசமயம் குறைபட்ட மோட்டார் சைக்கிள்களின் குறிப்பிட்ட பாகங்களை மாற்றம் செய்ய வேண்டும் என்று ஜப்பானிய இருசக்கர வாகன நிறுவனம் வலியுறுத்தியுள்ளது.

ரேடியேட்டர் மற்றும் டார்ஷன் ஸ்பிரிங் பிரச்சனையுள்ள 1,874 மோட்டார் சைக்கிள்கள் உள்ளூர் மற்றும் வெளிநாடுகளில் விற்கப்பட்டுள்ளது. இவை ஜூலை 2015 முதல் மே 2018 வரை தயாரிக்கப்பட்டவை.

இந்தப் பைக்குகளைக் கொண்டுள்ள உரிமையாளர்கள் யமஹா டீலர்களை தொடர்பு கொள்ள அறிவுறுத்தப்பட்டுள்ளது. அங்கு இலவசமாக சரிசெய்து தரப்படும் என்று அந்நிறுவனம் தெரிவித்துள்ளது.

யமஹா YZF-R3 மோட்டார் சைக்கிளின் விலை ரூ.3.48 லட்சம் ஆகும். இதில் 321 சிசி, லிக்யூடு கூல்டு, பேரலல்-டுவின் எஞ்சின், 10,750 rpmல் 41 bhp ஆற்றல், 9,000 rpmல் 29.6 Nm டர்க்யூ திறனை வெளிப்படுத்துகிறது. R3ல் ஸ்டாண்டர்டு மெட்ஸெலர் டயர்கள் மற்றும் டுவல் சேனல் ஏபிஎஸ் இருக்கின்றன.