தினமும் 10GB டேட்டா: ஜியோவை ஓரங்கட்டும் புதிய ஆஃபர்

சென்னை: ரிலையன்ஸ் ஜியோவை விட குறைந்த கட்டணத்தில் தினமும் 10GB டேட்டா அளிக்கும் திட்டத்தை பி.எஸ்.என்.எல். அறிமுகம் செய்துள்ளது.

ரிலையன்ஸ் ஜியோ நிறுவனம் வெல்கம் ஆஃபர், ஹேப்பி நியூ இயர் ஆஃபர் என்ற பெயர்களில் அளித்து வந்த இலவச சேவை மார்ச் 31ஆம் தேதியுடன் முடிகிறது. ஏப்ரல் 1ஆம் தேதி முதல் கட்டண சேவை தொடங்கும் ஜியோ, தொடர்ந்து மிகக் குறைந்த விலையில் தற்போது உள்ளது போன்ற இலவச சேவையைத் தொடர ஜியோ ப்ரைம் உறுப்பினராகும் வசதியை அளிக்கிறது. ரூ.99 ஆண்டுச்சந்தா செலுத்தி ஜியோ ப்ரைம் உறுப்பினராக வேண்டும். பின் மாதம் தோறும் ரூ.303 செலுத்தினால் தினசரி 1GB 4G டேட்டா மற்றும் அனைத்து வாய்ஸ் கால்கள் இலவசமாகப் பெறலாம்.

இந்நிலையில் ரிலையன்ஸ் ஜியோவின் இந்த ஆஃபரை ஓரங்கட்ட பொதுத்துறை தொலைத்தொடர்பு நிறுவனமான பிஎஸ்என்எல் அறிவித்திருக்கிறது. ரூ.249 மாதாந்திரக் கட்டணத்தில் தினசரி 10GB டேட்டா அளிக்கும் புதிய ஆஃபரை பிஎஸ்என்எல் அறிமுகம் செய்துள்ளது. மேலும், இந்த ஆஃபர் மூலம் ஒவ்வொரு ஞாயிற்றுக்கிழமையும் இரவு 9 மணி முதல் காலை 7 மணி வரை எந்த கட்டணமும் இல்லாமல் இந்தியா முழுவதும் வாய்ஸ் கால் செய்யலாம்.

இதன் மூலம் நாட்டிலேயே முதல் முறையாக தினசரி 10GB டேட்டா அளிக்கும் தொலைத்தொடர்பு நிறுவனம் என்ற பெயரை பிஎஸ்என்எல் பெறுவதாக அந்நிறுவனத்தின் இயக்குனர் என்.கே.குப்தா தெரிவித்துள்ளார்.

பிஎஸ்என்எல் அறிமுகம் செய்த இந்த ஆஃபர் இப்போதே வெற்றிகரமான முடிவைகளை அளிக்கத் தொடங்கியுள்ளதாகவும் பல புதிய வாடிக்கையாளர்கள் பிஎஸ்என்எல் இணைப்பு பெற்றுள்ளதாகவும் அந்நிறுவனம் கூறுகிறது.