கஷ்ட காலம்பா.. வேலை இழப்பு.. வருமானம் குறைவு.. பட்ஜெட்டை நம்பி இருக்கும் இந்திய குடும்பங்கள்!

இந்தியாவில் 60% குடும்பங்கள் வருமானம் குறையும் என்ற அச்சத்தில் இருப்பதாகவும், மத்திய அரசின் பட்ஜெட்டில் இருந்து நிவாரணத்தை எதிர்பார்ப்பதாகவும் சர்வே வாயிலாக தெரியவந்துள்ளது.

பிப்ரவரி 1ஆம் தேதி நாடாளுமன்றத்தில் மத்திய பட்ஜெட் தாக்கல் செய்யப்பட இருக்கிறது. ஆட்குறைப்பு, வேலை இழப்பு, வட்டி விகிதம் உயர்வு போன்ற பல்வேறு சிக்கல்களுக்கு மத்தியில் இந்த பட்ஜெட் வருகிறது. இதுமட்டுமல்லாமல், அடுத்த ஆண்டு நாடாளுமன்ற பொதுத் தேர்தல் வர இருப்பதாலும் இந்த பட்ஜெட் முக்கியத்துவம் வாய்ந்ததாக கருதப்படுகிறது.

இந்நிலையில், பட்ஜெட் தொடர்பான பொதுமக்களின் எதிர்பார்ப்பு குறித்து ஆன்லைன் தளமான LocalCircles சர்வே ஒன்றை நடத்தியுள்ளது. அதில், 60% இந்திய குடும்பங்கள் தங்களது வருமானமும், சேமிப்பும் குறையும் என அச்சத்தில் இருப்பதாக தெரியவந்துள்ளது.

ஜிஎஸ்டி ரொம்ப சிக்கலா இருக்கு.. பென்சன் திட்டம் வேணும்.. பட்ஜெட்டில் வர்த்தர்கள் எதிர்பார்ப்பு!
எனவே, மத்திய பட்ஜெட்டில் நிவாரணம் வேண்டும் என இந்திய குடும்பங்கள் எதிர்பார்ப்பதாகவும் இந்த சர்வே ரிப்போர்ட் கூறுகிறது. அடுத்த 6 முதல் 12 மாதங்களுக்கு பொருளாதார நிச்சயமின்மை நீடிக்கும் என 52% இந்திய குடும்பங்கள் அச்சத்தில் இருப்பதாக இந்த சர்வே கூறுகிறது.

மேலும் இந்த சர்வேயில், ஆண்டு வருமானம் 25% வரை குறையும் என அச்சம் இருப்பதாக பலர் தெரிவித்துள்ளனர். குடும்ப சேமிப்பு குறையும் என 56% பேர் தெரிவித்துள்ளனர். இந்த சர்வே நாடு முழுவதும் 309 மாவட்டங்களில் நடத்தப்பட்டுள்ளது. சுமார் 37000 பேர் இந்த சர்வேயில் பங்கேற்று பதில் அளித்துள்ளனர்.

இதுகுறித்து LocalCircles நிறுவனம், “இந்தியாவின் பெரும்பான்மை குடும்பங்கள் நெருக்கடியில் இருப்பதாக எங்கள் சர்வே கூறுகிறது. வருமான வரி விகிதங்களை குறைப்பது, வருமான வரி விலக்கு மற்றும் சலுகைகளை உயர்த்துவது போன்ற கோரிக்கைகளை ஏராளமானோர் முன்வைக்கின்றனர்” என்று தெரிவித்துள்ளது.