பட்ஜெட்: வரியைக் குறைக்க ஆட்டோமொபைல் துறை வேண்டுகோள்!

சென்ற ஆண்டு மத்திய பட்ஜெட்டில் ஆட்டோமொபைல் உதிரிப்பாகங்கள் உள்ளிட்ட பல்வேறு பொருட்களுக்கான இறக்குமதி வரி உயர்த்தப்பட்டது. அந்த பட்ஜெட் தாக்கல் செய்யப்படுவதற்கு முன்பாக, இழப்பீட்டு வரிக் குறைப்பு மற்றும் இறக்குமதி வரிக் குறைப்பு ஆகிய இரண்டு அம்சங்களை ஆட்டோமொபைல் துறையினர் முன்வைத்தனர். ஆனால் அது நிறைவேறாத நிலையில் இந்த பட்ஜெட்டிலும் அதே கோரிக்கை உள்ளது.

இந்த ஆண்டு தாக்கல் செய்யப்படும் பட்ஜெட் அறிக்கையில், ஆட்டோமொபைல் துறையில் முதலீட்டு ஊக்கத்தொகை திட்டத்தை மீண்டும் கொண்டுவர கோரிக்கை வைக்கப்பட்டுள்ளது. அதேபோல, உதிரிப்பாகங்களுக்கு ஒரே மாதிரியான ஜிஎஸ்டி இருக்க வேண்டும் என்பது பரவலான கோரிக்கையாக உள்ளது.

ஆராய்ச்சி மற்றும் மேம்பாட்டு செலவுகளுக்கு வரி விதிப்பது கூடுதல் நெருக்கடியாக இருப்பதாகவும் அதற்கு நிவாரணம் வழங்க வேண்டும் எனவும் ஆட்டோமொபைல் துறையினர் கோரிக்கை வைத்துள்ளனர். மத்திய அரசு அறிமுகம் செய்த உற்பத்தி மேம்பாட்டு ஊக்கத்தொகை திட்டத்துக்கு ஆட்டோமொபைல் துறையினர் வரவேற்பு தெரிவித்துள்ள நிலையில் அதற்குக் கூடுதல் நிதி ஒதுக்கப்படுமா என்ற எதிர்பார்ப்பு உள்ளது.

மத்திய பட்ஜெட் எப்படி இருக்கும்? என்ன எதிர்பார்க்கலாம்?
கொரோனா ஊரடங்கு பிரச்சினைகளால் வாகன உற்பத்தியும் விற்பனையும் கடுமையாகப் பாதிக்கப்பட்டது. ஆட்டோமொபைல் நிறுவனங்களும் வருவாய் இழப்பைச் சந்தித்தன. எனவே இத்துறைக்கு நிவாரணம் வழங்க ஏதேனும் சிறப்புத் திட்டங்கள் இந்த பட்ஜெட்டில் இருந்தால் உதவியாக இருக்கும் என ஆட்டோமொபைல் துறையினர் எதிர்பார்த்துக் காத்திருக்கின்றனர்.