Budget 2021: டூவீலர் வாகனங்களின் விலை குறையுமா?

பிப்ரவரி 1ஆம் தேதியன்று மத்திய பட்ஜெட் அறிக்கை தாக்கல் செய்யப்பட இருக்கிறது. இதில், ஆட்டோமொபைல் துறைக்கு என்னென்ன சலுகைகளை எதிர்பார்க்கலாம்? விதிமுறைகள் மாற்றம், விலை உயர்வு, டிமாண்ட் குறைவு போன்ற பல்வேறு பிரச்சினைகளால் ஆட்டோமொபைல் துறை பல சவால்களை சந்தித்து வருகிறது.

கொரோனா செய்த வினை ஒருபுறம் இருக்க, ஜிஎஸ்டி வரி உயர்வால் இருசக்கர வாகன துறை கடுமையான சவால்களை சந்தித்து வருகிறது. பைக் மற்றும் ஸ்கூட்டர் மீதான ஜிஎஸ்டி வரியை 18 விழுக்காட்டில் இருந்து 28 விழுக்காடாக உயர்த்தியது மத்திய அரசு. இதனால் இருசக்கர வாகனங்களின் விலை கடுமையாக உயர்ந்தது.

தற்போதைய சூழலில் இருசக்கர வாகனங்களின் விலை மிக அதிகமாக இருப்பதால் மக்களும் தயக்கம் காட்டுகின்றனர். எனவே, இருசக்கர வாகனங்கள் மீதான ஜிஎஸ்டி வரியை 28 விழுக்காட்டில் இருந்து 18 விழுக்காடாக குறைக்க வேண்டுமென்பதே ஆட்டோமொபைல் துறையினரின் கோரிக்கையாக இருக்கிறது.

வெகுமக்களின் போக்குவரத்து தேவைகளை பூர்த்தி செய்வதற்கு இருசக்கர வாகனங்களே பெரிதும் உதவுகின்றன. ஆனால், வரி உயர்வால் டூவீலர் வாகன விற்பனை சரிந்துள்ளது. எனவே, ஜிஎஸ்டி வரியை குறைப்பதால் ஆட்டோமொபைல் நிறுவனங்கள் மட்டுமல்லாமல் லட்சக்கணக்கான வாடிக்கையாளர்களும் பயன்பெறுவர் என ஆட்டோமொபைல் தொழில்துறையினர் கூறுகின்றனர்.

இன்னும் சொல்லப்போனால், டூவீலர் வாகனங்களுக்கு அதிக ஜிஎஸ்டி விதிக்கப்படுவதாக நிதியமைச்சர் நிர்மலா சீதாராமனே சில மாதங்களுக்கு முன் ஒப்புக்கொண்டார். எனவே, இந்த பட்ஜெட்டில் டூவீலர்களுக்கான ஜிஎஸ்டி வரி குறையும் என எதிர்பார்க்கப்படுகிறது. அப்படி குறைந்தால், விலை பழையபடி குறைந்துவிடும்.