பட்ஜெட் 2021: என்ன எதிர்பார்க்கிறது ஆட்டோமொபைல் துறை?

கொரோனா பாதிப்புக்கு மத்தியில் பொருளாதார வளர்ச்சியை மீட்டெடுப்பதைக் குறிக்கோளாகக் கொண்டு 2021 மத்திய பட்ஜெட் இன்னும் சில நாட்களில் தாக்கல் செய்யப்படவிருக்கிறது. காகிதமில்லா முறையில் தாக்கல் செய்யப்படவுள்ள இந்த பட்ஜெட் மீது நிறைய எதிர்பார்ப்புகள் உள்ளன. சாமானிய மக்கள் முதல் கோடீஸ்வரர்கள் வரை மத்திய பட்ஜெட்டில் நிறைய அம்சங்களை எதிர்பார்க்கின்றனர். இந்த பட்ஜெட்டில் நாட்டு மக்களுக்கு நிதி சார்ந்த ஆதரவை வழங்கும் வகையில் இருக்கவேண்டும் என பொருளாதார வல்லுநர்களும், நிபுணர்களும் பரிந்துரைத்துள்ளனர். இதுபோன்ற காலகட்டத்தில் மத்திய அரசு நிதிப் பற்றாக்குறை இலக்கை அடைவதைப் நோக்கமாக கொண்டிருக்கக் கூடாது எனவும் கருத்து தெரிவித்துள்ளனர்.

பல்வேறு துறைகளில் இருந்து இந்த பட்ஜெட் மீது நிறைய எதிர்பார்ப்புகளுடன் கோரிக்கைகள் வந்துகொண்டிருக்கின்றன. குறிப்பாக, இந்தியப் பொருளாதாரத்தின் மூச்சுக் காற்றாகக் கருதப்படும் ஆட்டோமொபைல் துறை அரசிடம் நிறைய சலுகைகளை எதிர்பார்க்கிறது. உள்நாட்டு உற்பத்தியிலும், வேலைவாய்ப்புகளை வழங்குவதிலும் இத்துறை முக்கியப் பங்கு வகிக்கிறது. எனவே கொரோனா பாதிப்பால் துவண்டு போன ஆட்டோமொபைல் துறைக்கு சரியான நிவாரணம் தேவை என்று மெர்சிடஸ் பென்ஸ் இந்தியா நிறுவனத்தின் தலைமைச் செயலதிகாரியான மார்டின் ஸ்வெங்க் கோரிக்கை வைத்துள்ளனர்.

நிதிக் கொள்கை என்றால் என்ன? பட்ஜெட் பற்றி தெரிந்துகொள்ள வேண்டியவை!

இழப்பீட்டு வரிக் குறைப்பு மற்றும் இறக்குமதி வரிக் குறைப்பு ஆகிய இரண்டு அம்சங்களை ஆட்டோமொபைல் துறையினர் இந்த பட்ஜெட்டில் அதிகமாக எதிர்பார்க்கின்றனர். ஜிஎஸ்டி வரியைக் குறைக்காவிட்டாலும், 22 சதவீதமாக இருக்கும் இழப்பீட்டு வரியைக் குறைக்க வேண்டும் என்கிறார் மார்டின் ஸ்வெங்க். ஆடம்பர கார்கள் மற்றும் பிரீமியம் வகை கார்களுக்கு இவ்வளவு அதிகமாக இழப்பீட்டு வரி வசூலிக்கப்படுவது நெருக்கடியை ஏற்படுத்துவதாகவும் அவர் தெரிவித்துள்ளார். அதேபோல, 40,000 டாலருக்கு மேல் மதிப்பு கொண்ட வாகனங்களுக்கான இறக்குமதி வரி 110 சதவீதமாக இருப்பதாகவும், அதைக் குறைக்க வேண்டும் எனவும் கோரிக்கை வைத்துள்ளனர்.

பட்ஜெட்டில் மிடில் கிளாஸ் மக்களின் எதிர்பார்ப்பு!

ஆடம்பர கார்கள் மற்றும் பிரீமியம் வகை கார்களுக்கு வரியுடன் சேர்த்து உற்பத்திச் செலவுகள் அதிகமாக இருப்பதால் இந்த விஷயங்களில் நிவாரணம் தரும் வகையில் மத்திய பட்ஜெட்டில் அம்சங்கள் இடம்பெற வேண்டும் என்று இத்துறையினர் முறையிட்டுள்ளனர்.