எலக்ட்ரிக் வாகனங்கள் வாங்கினால் அதிரடி வருமான வரிச்சலுகை: மத்திய பட்ஜெட்டில் அசத்தல்!

மத்தியில் ஆட்சி அமைத்துள்ள பாஜக அரசு, 2019-20ஆம் நிதியாண்டிற்கான பட்ஜெட்டை இன்று தாக்கல் செய்தது. முதல்முறையாக நிதியமைச்சராக பதவியேற்றுக் கொண்ட நிர்மலா சீதாராமன், நாடாளுமன்றத்தில் இன்று பட்ஜெட்டை வாசித்தார்.

அதில், எலக்ட்ரிக் வாகன பயன்பாட்டை ஊக்குவிக்கும் வண்ணம் முக்கிய அறிவிப்பு வெளியிடப்பட்டுள்ளது. அதாவது, எலக்ட்ரிக் வாகனங்களுக்கு வாங்கும் வாடிக்கையாளர்களுக்கு ரூ.1.5 லட்சம் வரை வருமான வரி சலுகை பெறலாம் என்று அறிவிக்கப்பட்டுள்ளது.

இதுதொடர்பாக பட்ஜெட்டில் பேசிய நிர்மலா சீதாராமன், எலக்ட்ரிக் வாகனங்களுக்கான ஜி.எஸ்.டி வரியை 12%ல் இருந்து 5%ஆக குறைக்க ஜி.எஸ்.டி கவுன்சிலிடம் அரசு கோரிக்கை விடுத்துள்ளது.

எலக்ட்ரிக் வாகனங்களின் பயன்பாட்டை வாடிக்கையாளர்களிடம் ஊக்குவிக்க பல்வேறு முயற்சிகள் மேற்கொள்ளப்பட்டு வருகிறது. குறிப்பாக எலக்ட்ரிக் வாகனங்கள் வாங்குவதற்கான வங்கிக் கடனில் ரூ.1.5 லட்சம் அளவிற்கு வரி தளர்த்தப்படும்.

எலக்ட்ரிக் வாகன பயன்பாட்டை உறுதி செய்ய அரசு ரூ.10,000 கோடி நிதி ஒதுக்கீடு செய்துள்ளது.

இதன்மூலம் வாடிக்கையாளர்கள் தங்கள் கடனுக்கான காலக்கட்டத்தில் பெருமளவு சலுகை பெற முடியும். நாட்டின் நலனில் அக்கறை கொண்டு முறையாக வரி செலுத்தி வருவோருக்கு மிக்க நன்றி. உங்களின் பங்களிப்பு நாட்டின் முன்னேற்றத்திற்கு பெரிதும் உதவும் என்று தெரிவித்தார்.