Economic Survey 2020: அடுத்த ஆண்டில் வளர்ச்சி எப்படி இருக்கும்?

2020-21 நிதியாண்டுக்கான மத்திய பட்ஜெட் நாளை (பிப்ரவரி 1) மத்திய நிதியமைச்சர் நிர்மலா சீதாராமனால் தாக்கல் செய்யப்படுகிறது. இந்த பட்ஜெட் மீது அதிக எதிர்பார்ப்பு நிலவுகிறது. ஏனெனில், இந்தியப் பொருளாதார வளர்ச்சி முன்னெப்போதும் இல்லாத அளவுக்கு வீழ்ச்சியடைந்துள்ள நிலையில், அதை மேம்படுத்துவதற்கான முக்கிய அறிவிப்புகள் இந்த பட்ஜெட்டில் இடம்பெற்றிருக்கும் என்று எதிர்பார்க்கப்படுகிறது. அதற்கு முன்னர் 2020 பொருளாதார ஆய்வறிக்கை இன்று நாடாளுமன்றத்தில் தாக்கல் செய்யப்பட்டது.

பட்ஜெட் 2020 - டேட்டா ஹப்

பொருளாதார ஆய்வறிக்கையில், 2020-21 நிதியாண்டில் இந்தியப் பொருளாதார வளர்ச்சி 6 முதல் 6.5 சதவீதம் வரையில் இருக்கும் என்று மதிப்பிடப்பட்டுள்ளது. இது முந்தைய ஆண்டுகளில் இந்தியா கொண்டிருந்த வளர்ச்சியை விடக் குறைவுதான் என்றாலும், தற்போதைய பொருளாதார மந்தநிலையுடன் ஒப்பிடும் போது இந்த வளர்ச்சி மதிப்பீடு திருப்திகரமான ஒன்றுதான் என்று கருதப்படுகிறது.

பட்ஜெட் 2020 - வேர்ட் பிளே

2016-17ஆம் ஆண்டில் மிக அதிகமாக 8.2 சதவீத வளர்ச்சியைக் கொண்டிருந்த இந்தியப் பொருளாதாரம் உலகளவில் மிக வேகமான வளர்ச்சியைக் கொண்ட நாடாகத் திகழ்ந்தது. அதைத் தொடர்ந்த 2017-18ஆம் ஆண்டில் 7.2 சதவீதமாகக் குறைந்த வளர்ச்சி, பின்னர் 2018-19ஆஅம் ஆண்டில் 6.8 சதவீதமாக வீழ்ந்தது. மோடி அரசு இரண்டாவது முறையாக ஆட்சிப் பொறுப்பேற்ற பின்னர் 2019-20 நிதியாண்டில் நாட்டின் வளர்ச்சி மேம்படும் என்று எதிர்பார்க்கப்பட்டது. ஆனால், மிக மோசமான வீழ்ச்சியையே இந்தியா சந்திக்கத் தொடங்கியது.

நிதி அமைச்சரை விட நீங்கள் சிறந்தவரா...?

நடப்பாண்டின் ஏப்ரல் - ஜூன் காலாண்டில் 5 சதவீதமாகக் குறைந்த வளர்ச்சி, ஜூலை - செப்டம்பர் காலாண்டில் இன்னும் மோசமாக 4.5 சதவீதமாகச் சரிந்தது. இது நாடு முழுவதும் பல்வேறு விமர்சனங்களையும், எதிர்ப்புகளையும் மோடி அரசுக்கு எதிராக ஏற்படுத்தியது. எனவே, 2020-21 நிதியாண்டில் வளர்ச்சியை மேம்படுத்துவதற்கான வளர்ச்சித் திட்டங்கள் இந்த பட்ஜெட்டில் இடம்பெறும் என்று எதிர்பார்க்கப்படுகிறது. தற்போது வெளியாகியுள்ள பொருளாதார ஆய்வறிக்கையில், 2019-20 நிதியாண்டில் 5 சதவீதமாகவும், 2020-21 நிதியாண்டில் 6 முதல் 6.5 சதவீதம் வரையிலும் வளர்ச்சி இருக்கும் என்று மதிப்பிடப்பட்டுள்ளது.