புதுடெல்லி : 2019-20 நிதியாண்டுக்கான இடைக்கால பட்ஜெட்டை மத்திய அரசு இன்று தாக்கல் செய்ய உள்ளது. இதில் பல்வேறு சலுகைகள் எதிர்பார்க்கப்படுகின்றன.

பரபரப்பான அரசியல் சூழலில் 16 ஆவது மக்களவையின் கடைசி கூட்டத்தொடர் நேற்று காலை 11 மணிக்கு குடியரசுத் தலைவர் ராம்நாத் கோவிந்தின் உடையுடன் தொடங்கியது. இந்த பட்ஜெட் கூட்டத்தொடர் வரும் பிப்ரவரி 13ம் தேதி வரை தொடர்ந்து நடக்கிறது.

Also Read: 2019 Budget Live: இடைக்கால பட்ஜெட் 2019 லைவ் அப்டேட்
இன்னும் சில மாதங்களில் மத்திய அரசின் பதவிகாலம் முடிவடைந்து, ஏப்ரல் - மே மாதத்தில் நாடாளுமன்ற தேர்தல் நடக்க இருகின்றது. இதன் காரணமாக இன்று இடைக்கால பட்ஜெட் தாக்கல் செய்யப்பட உள்ளது. இதில் பல்வேறு சலுகைகள் அளித்து, வாக்குகளை பெறலாம் என்ற நோக்கில், எல்லா அரசியல் கட்சிகளும் செய்யக்கூடிய அதே வேலையை மத்தியில் ஆட்சியில் உள்ள பாஜக அரசு முயற்சிக்கிறது.

மத்திய நிதி அமைச்சர் அருண் ஜெட்லிக்கு உடல்நிலை பிரச்னை காரணமாக, இன்றைய இடைக்கால பட்ஜெட்டை, இடைக்கால நிதி அமைச்சராக நியமிக்கப்பட்டுள்ள பியூஸ் கோயல் தாக்கல் செய்ய உள்ளார்.

விரைவில் தேர்தல் நடக்க உள்ளதால், சில முக்கிய அறிவிப்புகள், சலுகைகள் அறிவிக்கப்படலாம் என எதிர்பார்க்கப்படுகிறது.

வேறு வழி இல்லை:
சமீபத்தில் நடந்த 5 மாநில தேர்தலில் பாஜக 3 மாநிலங்களில் ஆட்சியை இழக்க நேரிட்டது. இதற்கு விவசாயிகளின் பிரச்னை தான் முதன்மையாக பார்க்கப்படுகிறது. இதனால் பயிர்க் காப்பீட்டுக்கான பிரீமியம் ரத்து; முறையாக கடனை செலுத்தும் விவசாயிகளுக்கு, வட்டி ரத்து; விவசாயிகளுக்கு, 1 லட்சம் கோடி ரூபாய் அளவுக்கு நிவாரணம் அளிக்கும் திட்டம்; உணவு மானியத்துக்காக, 1.8 லட்சம் கோடி ரூபாய் ஒதுக்கீடு போன்ற அறிவிப்புகள் வெளியாகலாம்.

அதுமட்டுமல்லாமல் நடுத்தரவரகத்தினரின் வருவாய் மற்றும் சிறு வர்த்தகர்களுக்கு வரிச்சலுகை அளிக்கப்படலாம். தங்கத்தின் மீதான வரி குறைப்பு, சுகாதார துறைக்கான ஒதுக்கீட்டை உயர்த்துதல், பொதுத் துறை காப்பீட்டு நிறுவனங்களில், 4,000 கோடி ரூபாய் முதலீடு; ஆண்டுக்கு, 5 கோடி ரூபாய்க்கு குறைவாக வியாபாரம் செய்யும் நிறுவனங்களுக்கு, கடன் வட்டியில் சலுகை போன்றவை அறிவிக்கப்படும் என, எதிர்பார்க்கப்படுகிறது.