மத்திய பட்ஜெட்டில் தமிழக ரயில்வேக்கு ரூ.2,548 கோடி ஒதுக்கீடு!

மத்திய பட்ஜெட்டிலிருந்து தமிழக ரயில்வேக்கு ரூ.2,548 கோடி ஒதுக்கீடு செய்யப்பட்டுள்ளதாக, இந்திய ரயில்வே அமைச்சகம் தெரிவித்துள்ளது.

2018-19ஆம் ஆண்டுக்கான பட்ஜெட் பிப்ரவரி 1ஆம் தேதி, நாடாளுமன்றத்தில் தாக்கல் செய்யப்பட்டது. இதில் ரயில்வே துறைக்கு ஒரு லட்சத்து 48 ஆயிரத்து 528 கோடி ரூபாய் ஒதுக்கீடு செய்யப்பட்டது. தற்போது அதில் தமிழக ரயில்வே திட்டங்களுக்கு 2 ஆயிரத்து 548 கோடி ரூபாய் ஒதுக்கீடு செய்யப்பட்டுள்ளதாக, ரயில்வே அமைச்சகம் தெரிவித்துள்ளது.

இதன்மூலம் 376 கோடி ரூபாய் செலவில், பெங்களூரில் உள்ள பையப்பன்னஹள்ளியில் இருந்து ஒசூருக்கு இரட்டை ரயில் பாதை அமைக்கப்படும் என்று தெரிவித்துள்ளது. மேலும் தமிழகத்தில் 20 ஆயிரத்து 64 கோடி ரூபாய் மதிப்பிலான 27 ரயில்வே திட்டங்கள் செயல்படுத்தப்பட்டு வருவதாகவும், அதில் 3 ஆயிரத்து 198 கிலோ மீட்டர் தூர ரயில் பாதையும் அடங்கும் என்றும் ரயில்வே அமைச்சகம் கூறியுள்ளது.

ரயில்வே பட்ஜெட்டில் அதிகபட்சமாக உத்தரபிரதேச மாநிலத்துக்கு, 7 ஆயிரத்து 685 கோடி ரூபாய் ஒதுக்கீடு செய்யப்பட்டுள்ளது குறிப்பிடத்தக்கது.