Vehicle Scrappage Policy என்றால் என்ன? இதனால் என்ன பயன்?

மத்திய பட்ஜெட் இன்று தாக்கல் செய்யப்படுகிறது. நிதியமைச்சர் நிர்மலா சீதாராமன் தனது உரையில் தன்னார்வ வாகன ஸ்க்ராப்பேஜ் (Voluntary Vehicle Scrappage Policy) கொள்கையை அறிவித்துள்ளார்.

இதன்படி, 20 ஆண்டுகள் பழைய பயணிகள் வாகனங்கள் (கார் போன்ற வாகனங்கள்), 15 ஆண்டுகள் பழைய வர்த்தக வாகனங்கள் (லாரி போன்றவை) தகுதி சோதனை செய்துகொள்ள வேண்டுமென நிதியமைச்சர் அறிவித்துள்ளார்.

வாகன ஸ்க்ராப்பேஜ் கொள்கை குறித்து நிதியமைச்சர் அறிவித்ததை தொடர்ந்து ஆட்டோமொபைல் துறை சார்ந்த பங்கு விலைகள் எகிறியுள்ளன. வாகன ஸ்க்ராப்பேஜ் கொள்கை (Vehicle Scrappage Policy) என்றால் என்ன?

வாகன ஸ்க்ராப்பேஜ் கொள்கை என்றால், பழைய வாகனங்களை நொறுக்கி அகற்றிவிட்டு புதிய வாகனங்களை வாங்குவதுதான். அதாவது, 20 ஆண்டுகள் பழைய கார் வைத்திருந்தால் அதை நொறுக்கிவிட்டு புதிய கார் வாங்க வேண்டும். இதற்கு தேவையான சில நிதி மற்றும் வரிச் சலுகைகளை அரசே வழங்கும். இதன் மற்றொரு பயன், காற்று மாசுப்பாடு குறைக்கப்படும்.

2019ஆம் ஆண்டின் இறுதிக்கு பிறகு கொரோனா தாக்கத்தால் இந்திய ஆட்டோமொபைல் துறை கடுமையாக பாதிக்கப்பட்டது. விற்பனை கடுமையாக சரிந்தது. ஓராண்டு கடந்த பிறகும் இன்னும் ஆட்டோமொபைல் துறை மீளவில்லை.

எனவே, இந்திய ஆட்டோமொபைல் துறைக்கு உதவும் நோக்கில் தன்னார்வ வாகன ஸ்க்ராப்பேஜ் கொள்கையை நிதியமைச்சர் அறிவித்துள்ளார். இதனால் வாகன உற்பத்தி நிறுவனங்களுக்கு நிவாரணம் கிடைக்கும். பழைய கார்கள் அகற்றப்பட்டு புதிய கார்கள் மற்றும் லாரிகளை வாங்குவதால் விற்பனை உயரும்.