இந்தியாவில் பெட்ரோல், டீசல் விலை குறைய வாய்ப்பு உள்ளதா?

உலகிலேயே பெட்ரோல், டீசல் நுகர்வில் இந்தியா 3வது இடத்தில் உள்ளது. நாள் ஒன்றுக்கு கச்சா எண்ணெய் நுகர்வு 4.5 மில்லியன் பேரல்களாக உள்ளது. ஒரு பேரல் என்பது 159 லிட்டராகும்.

உலகில் இன்று கச்சா எண்ணெய் நுகர்வில் மூன்றாம் இடத்தில் இருக்கும் இந்தியாவில் தினமும் பெட்ரோல், டீசல் விலை உயர்வு பொது மக்களை கஷ்டத்திற்கு உள்ளாக்கி வருகிறது. இந்த நிலையில், இந்தியாவிடம் சிறிதளவே எண்ணெய் இருப்பு உள்ளது. 80 சதவீதம் இறக்குமதியைதான் இந்தியா நம்பி உள்ளது.

சர்வதேச எண்ணெய் விலை உயர்வு மட்டும் விலை உயர்வை நிர்ணயிப்பதில்லை. உள்நாட்டு உற்பத்தி, சுத்திகரிப்பு திறன் ஆகியவற்றை பொருத்தும் விலை உயர்வு இருக்கும் என்று கூறப்படுகிறது. சுத்திகரிப்பு செலவு அதிகரிக்கும்போது, இதன் சுமை பெட்ரோல், டீசல் மீது விழுகிறது. உள்நாட்டு உற்பத்தி செலவினத்தை அடிப்படையாக வைத்து விலையை நிர்ணயிக்குமாறு கடந்த 1970ல் இருந்து 2000 வரை எண்ணெய் நிர்ணய கமிட்டி பரிந்துரை செய்து இருந்தது. இதனாலேயே, விலை அதிகரித்து வருவதாக கூறப்படுகிறது. இதற்கு மாற்றாக செலவினம் குறையும்போது, பெட்ரோல், டீசல் விலை குறைய வாய்ப்பு இருக்கிறது. மேலும், உலக அளவில் கச்சா எண்ணெய் விலை உயர்வும் இதற்கு காரணமாகிறது.

கடந்த நான்கு ஆண்டுகளில் மாநில மற்றும் மத்திய அரசுகள் பெரிய அளவில் பெட்ரோல், டீசல் மீது வரி வசூல் செய்துள்ளது. கடந்த 2013-2014ஆம் ஆண்டில், மத்திய அரசு பெட்ரோலியத்தின் மீதான வரியாக ரூ. 1.1 லட்சம் கோடி வசூல் செய்துள்ளது. இதிலிருந்து, மானியம் உள்பட பல்வேறு செலவினங்களாக ரூ. 0.8 லட்சம் கோடி செலவு செய்துள்ளது. மத்திய அரசுக்கு நிகர லாபமாக ரூ. 0.3 லட்சம் கோடி கிடைத்துள்ளது. இது கடந்த 2016-2017ஆம் ஆண்டில் ரூ. 2.5 லட்சம் கோடியாக இருந்தது.

மத்திய அரசுக்கு லாபம் இருந்தாலும், இந்த சுமை மக்கள் மீது விழுவது மத்திய அரசுக்கு எதிரான குரல்களாக மாறியுள்ளது. தமிழகத்தில் பஸ் கட்டண உயர்வுக்கும், டீசல் விலை உயர்வுதான் காரணமாக கூறப்படுகிறது. இவ்வாறு, பெட்ரோல், டீசல் விலை மறைமுகமாகவும், நேரடியாகவும் மக்களை பெரிய அளவில் பாதிக்கிறது என்றே கூற வேண்டும்.