இன்று முதல் அமலுக்கு வரும்.. 10 புதிய வருமான வரி விதிகள்.. முழு விவரம் இதோ!

இன்று முதல் புதிய 2023-24ஆம் நிதியாண்டு தொடங்குகிறது. புதிய நிதியாண்டுக்கான பட்ஜெட்டில் வருமான வரி சார்ந்த பல்வேறு புதிய விதிமுறைகள் அறிவிக்கப்பட்டன. இந்த வருமான வரி விதிமுறைகள் ஏப்ரல் 1ஆம் தேதி முதல் அமலுக்கு வருகின்றன. அவ்வகையில், வருமான வரி சார்ந்து என்னென்ன மாற்றங்கள் அமலுக்கு வருகின்றன என்பதை பார்க்கலாம்.

புதிய வருமான வரி விகிதங்கள்

புதிய வருமான வரி முறையில் வரி விகிதங்கள் திருத்தப்பட்டுள்ளன. புதிய விகிதங்கள் பின்வருமாறு,

3 லட்சம் ரூபாய் வரை : 0%

3 லட்சம் - 6 லட்சம் ரூபாய் : 5%

6 லட்சம் - 9 லட்சம் ரூபாய் : 10%

9 லட்சம் - 12 லட்சம் ரூபாய் : 15%

12 லட்சம் - 15 லட்சம் ரூபாய் : 20%

15 லட்சம் ரூபாய் வரை : 30%

நிலையான வரி விலக்கு

சம்பளதாரர்கள், ஓய்வூதியதாரர்களுக்கு புதிய வருமான வரி முறையில் 50,000 ரூபாய் நிலையான விலக்கு (Standard deduction) வழங்கப்படும். குடும்ப ஓய்வூதியதாரர்களுக்கு 15000 ரூபாய் நிலையான விலக்கு வழங்கப்படும்.

இயல்பான வருமான வரி முறை (Default income tax)

ஏப்ரல் 1ஆம் தேதி முதல் புதிய வருமான வரி முறையே இயல்பான வருமான வரி முறையாக இருக்கும். பழைய வருமான வரி முறைக்கு மாற விரும்புவோர் தங்கள் விருப்பத்தின் பேரில் பழைய வருமான வரி முறையை தேர்வு செய்துகொள்ளலாம்.

வருமான வரி உச்சவரம்பு

புதிய வருமான வரி முறையில் வருமான வரி உச்சவரம்பு 7 லட்சம் ரூபாயாக உயர்த்தப்பட்டுள்ளது. இதன்படி, புதிய வருமான வரி முறையை தேர்வு செய்வோர், ஆண்டுக்கு 7 லட்சம் ரூபாய் வரை வருமானம் ஈட்டினால் அவர்கள் வருமான வரி செலுத்த தேவையில்லை.

TDS

ஆன்லைன் சூதாட்ட விளையாட்டுகள் உள்ளிட்ட ஆன்லைன் விளையாட்டுகளில் கிடைக்கும் வெற்றி தொகைக்கு 30% டிடிஎஸ் (TDS) வரி விதிக்கப்படும்.

ஆயுள் காப்பீடு பாலிசி (Life insurance policy)

ஆயுள் காப்பீட்டு பாலிசிதாரர்கள் ஆண்டுக்கு 5 லட்சம் ரூபாய்க்கு மேல் பிரீமியம் செலுத்தினால், முதிர்வு தொகைக்கு (Maturity) வரி விதிக்கப்படும். இந்த விதிமுறை 2023 ஏப்ரல் 1ஆம் தேதிக்கு பின் வாங்கப்படும் ஆயுள் காப்பீடு பாலிசிகளுக்கு மட்டுமே பொருந்தும். மேலும் யுலிப் (ULIP) பாலிசிகளுக்கு இந்த விதிமுறை பொருந்தாது.

மியூச்சுவல் ஃபண்ட்

கடன் பத்திரங்களில் முதலீடு செய்யும் கடன் மியூச்சுவல் ஃபண்ட்களுக்கு (Debt mutual funds) ஏப்ரல் 1ஆம் தேதி முதல் லாபத்துக்கு வரி விதிக்கப்படும். சம்பந்தப்பட்ட வரி செலுத்தும் நபருக்கான வரி விகிதத்திலேயே மூலதன ஆதாயத்துக்கு (capital gains) வரி விதிக்கப்படும். 35% மேல் பங்குகளில் முதலீடு செய்யாத எல்லா மியூச்சுவல் ஃபண்ட்களுக்கும் இந்த விதிமுறை பொருந்தும்.