அதானி லாபம் 138% உயர்வு.. ஹிண்டன்பர்க் தாக்கம் குறையுமா?

அதானி எண்டர்பிரைசஸ் (Adani Enterprises) நிறுவனம் தனது மார்ச் காலாண்டு முடிவுகளை இன்று வெளியிட்டுள்ளது. அதன்படி, மார்ச் காலாண்டில் அதானி எண்டர்பிரைசஸ் நிறுவனத்தின் லாபம் 138% உயர்ந்துள்ளதாக தெரிவிக்கப்பட்டுள்ளது.

லாபம்

ஜனவரி - மார்ச் காலாண்டில் அதானி எண்டர்பிரைசஸ் நிறுவனத்தின் நிகர அலாபம் 138% அதிகரித்து 722.48 கோடி ரூபாயாக உயர்ந்துள்ளது. கடந்த ஆண்டு மார்ச் காலாண்டில் அதானி எண்டர்பிரைசஸ் நிறுவனத்தின் லாபம் 304.32 கோடி ரூபாயாக இருந்தது குறிப்பிடத்தக்கது.

வருவாய்

மார்ச் காலாண்டில் அதானி எண்டர்பிரைசஸ் நிறுவனத்தின் வருவாய் 26% அதிகரித்து 31,346.05 கோடி ரூபாயாக உயர்ந்துள்ளது. கடந்த ஆண்டு மார்ச் காலாண்டில் அதானி எண்டர்பிரைசஸ் நிறுவனத்தின் வருவாய் 24,865.52 கோடி ரூபாயாக இருந்தது.

லாபத்தில் ஒரு சிக்கல்

கடந்த ஆண்டு மார்ச் காலாண்டுடன் ஒப்பிட்டால் அதானி எண்டர்பிரைசஸ் நிறுவனத்தின் லாபம் 138% உயர்ந்துள்ளது. இருப்பினும், மார்ச் காலாண்டுக்கு முந்தைய காலாண்டான டிசம்பர் காலாண்டுடன் ஒப்பிட்டால் அதானி எண்டர்பிரைசஸ் நிறுவனத்தின் லாபம் 12% சரிந்துள்ளது. டிசம்பர் காலாண்டில் அதானி எண்டர்பிரைசஸ் நிறுவனத்தின் லாபம் 820.06 கோடி ரூபாய் என்பது குறிப்பிடத்தக்கது.

ஹிண்டன்பர்க் தாக்கம் தணியுமா?

அதானி குழுமத்தின் பிரதான நிறுவனம் அதானி எண்டர்பிரைசஸ். கடந்த ஜனவரி மாதம் அமெரிக்காவை சேர்ந்த ஹிண்டன்பர்க் நிறுவனம் அதானி குழுமம் கணக்கு மோசடி உள்ளிட்ட முறைகேடுகளில் ஈடுபட்டுள்ளதாக குற்றம்சாட்டியது. இதனால் அதானி எண்டர்பிரைசஸ் உள்பட அதானி குழுமத்தின் பங்குகள் கடுமையாக சரிந்தன.

தற்போது கடந்த ஆண்டுடன் ஒப்பிட்டால் அதானி எண்டர்பிரைசஸ் லாபம் 138% உயர்ந்துள்ளது. ஆனால், முந்தைய காலாண்டுடன் ஒப்பிட்டால் லாபம் 12% சரிந்துள்ளது. இத்தகைய சூழலில் நாளை பங்கு வர்த்தகத்தின் போது அதானி எண்டர்பிரைசஸ் பங்கு மீதான தாக்கம் எப்படி இருக்கும் என்பது எதிர்பார்ப்பை எழுப்பியுள்ளது.