சும்மா இருக்கும் பணத்தை வைத்து அதானி போடும் திட்டம்!

அதானி (Adani) குழுமம் தன்னிடம் உள்ள உபரி தொகையை பயன்படுத்தி அதானியின் அந்நிய நாணய பத்திரங்களை திருப்பி வாங்குவதற்கு (foreign currency bonds buyback) திட்டமிட்டு வருவதாக தகவல் வெளியாகியுள்ளது.

அதானி குழுமம் ஹிண்டன்பர்க் அறிக்கையால் பல்வேறு பிரச்சினைகளில் சிக்கியுள்ளது. அதானி குழுமம் கணக்கு மோசடி உள்ளிட்ட முறைகேடுகளில் ஈடுபட்டுள்ளதாக அமெரிக்காவை சேர்ந்த ஹிண்டன்பர்க் நிறுவனம் வெளியிட்ட அறிக்கையில் குற்றம்சாட்டியது.

இதனால் அதானி குழுமத்தின் பங்குகள் கடுமையாக சரிந்துவிட்டன. உலக பணக்காரர்கள் பட்டியலிலும் கவுதம் அதானி பின்னுக்கு தள்ளப்பட்டார். இதையடுத்து முதலீட்டாளர்களின் நம்பிக்கையை பெறுவதையே நோக்கமாக கொண்டு அதானி குழுமம் பல்வேறு முயற்சிகளை எடுத்து வருகிறது.

இதற்காக ஹாங் காங், சிங்கப்பூர், துபாய், லண்டன் என பல்வேறு இடங்களில் முதலீட்டாளர்களுக்கான நிகழ்வுகளை அதானி குழுமம் நடத்தியது. மேலும் அதானி குழுமத்தின் மீதான மிகப்பெரிய புகார் அந்நிறுவனத்துக்கு இருக்கும் ஏராளமான கடன்கள்தான்.

எனவே, முதலீட்டாளர்களின் நம்பிக்கையை பெறுவதற்காக கடன்களையும் அடைக்க அதானி குழுமம் முயற்சித்து வருகிறது. அதானி குழுமத்துக்கு வங்கி கடன்கள் மட்டுமல்லாமல் கடன் பத்திரங்கள் வாயிலாகவும் நிறைய கடன்கள் இருக்கின்றன. இதில் அமெரிக்க டாலர் உள்ளிட்ட வெளிநாட்டு நாணயங்களிலும் பத்திரங்கள் உள்ளன.

இந்நிலையில், அதானி குழுமம் தன்னிடம் உள்ள உபரி தொகையையும், லாபத்தையும் பயன்படுத்தி பல மில்லியன் டாலர் மதிப்புள்ள கடன் பத்திரங்களை திரும்ப வாங்குவதற்கு திட்டமிட்டுள்ளதாக தகவல் வெளியாகியுள்ளது.

இதன்படி, அதானி போர்ட்ஸ் (APSEZ) நிறுவனத்தின் 650 மில்லியன் டாலர் மதிப்புள்ள கடன் பத்திரங்களை முதற்கட்டமாக வாங்குவதற்கு அதானி குழுமம் திட்டமிட்டுள்ளதாக கூறப்படுகிறது. அதானி குழுமத்தின் மொத்த கடன்களில் வங்கி கடன்கள், வெளிநாட்டு வங்கி கடன்கள், கடன் பத்திரங்கள் உள்ளிட்டவை இருக்கின்றன. இதில் அந்நிய நாணய பத்திரங்களின் பங்கு மட்டும் சுமார் 39% ஆகும்.