ரூ.7374 கோடி கடன்களை திருப்பி செலுத்திய அதானி குழுமம்!

அதானி குழுமம் (Adani group) இந்திய வங்கிகளுக்கும், சர்வதேச வங்கிகளுக்கும் 7,374 கோடி ரூபாய் மதிப்பிலான கடன்களை (Loans) அடைத்துவிட்டதாக தெரிவித்துள்ளது.

அதானி குழுமம் பல்வேறு நெருக்கடிகளை சந்தித்து வருகிறது. அதானி குழுமம் இந்திய வங்கிகளிடமும், சர்வதேச வங்கிகளிடமும் பல்லாயிரம் கோடி ரூபாய் கடன் வாங்கியுள்ளது. இதுமட்டுமல்லாமல், கடன் பத்திரங்கள் வாயிலாகவும் பல்லாயிரம் கோடி ரூபாய் கடன் வாங்கியுள்ளது அதானி குழுமம்.

அதானி குழுமம் பல்வேறு முறைகேடுகளில் ஈடுபட்டுள்ளதாக ஜனவரி 24ஆம் தேதி ஹிண்டென்பர்க் நிறுவனம் ஆய்வறிக்கை வெளியிட்டது. இதைத்தொடர்ந்து அதானி நிறுவனங்களின் பங்குகள் மிக கடுமையாக சரிந்தன. இதையடுத்து, முதலீட்டாளர்களின் நம்பிக்கையை பெறுவதற்கு அதானி முயற்சித்து வருகிறது.

அதானி குழுமத்துக்கு மிக அதிக கடன்கள் இருப்பதே முக்கிய பிரச்சினை என விமர்சிக்கப்படுகிறது. எனவே, கடன்களை குறைத்து முதலீட்டாளர்களின் நம்பிக்கையை பெறுவதற்காக அதானி குழுமம் முயற்சித்து வருகிறது. இதற்காக சிங்கப்பூர், ஹாங் காங்கில் நிகழ்ச்சிகளையும் நடத்தியுள்ளது.

இந்நிலையில், பல்வேறு இந்திய வங்கிகளுக்கும், சர்வதேச வங்கிகளுக்கும் 7,374 கோடி ரூபாய் (901.16 மில்லியன் டாலர்) கடன்களை திருப்பிச் செலுத்தியுள்ளதாக அதானி குழுமம் இன்று தெரிவித்துள்ளது.

ஏற்கெனவே அமெரிக்காவை சேர்ந்த GQG Partners நிறுவனம் அதானி குழுமத்தில் அண்மையில் 15,446 கோடி ரூபாய் முதலீடு செய்துள்ளது. இதனால் கடந்த சில தினங்களாகவே அதானி நிறுவனங்களின் பங்குகள் உயர்ந்து வருகின்றன.

இந்நிலையில், தற்போது அதானி குழுமம் 7,374 கோடி ரூபாய் கடன்களை செலுத்தியுள்ளதாக தெரிவித்துள்ளது. இதனால், நாளை பங்கு வர்த்தகத்தின்போது அதானி நிறுவனங்களின் பங்குகள் உயரலாம் என எதிர்பார்க்கப்படுகிறது.