எல்லா கடன்களையும் அடைத்துவிட்டோம்.. அதானி பதில்!

அதானி குழுமம் முதலீட்டாளர்களின் நம்பிக்கையை பெறுவதற்காக வெளிநாட்டு நகரங்களில் நிகழ்ச்சிகளை நடத்தி வருகிறது. இந்நிலையில், பங்குகளை வைத்து வாங்கிய கடன்கள் அனைத்தும் அடைக்கப்பட்டுவிட்டதாக லண்டனில் முதலீட்டாளர்களிடம் அதானி குழுமம் தெரிவித்துள்ளது.

அதானி குழுமம் முறைகேடுகளில் ஈடுபட்டுள்ளதாக அமெரிக்க நிறுவனமான ஹிண்டென்பர்க் ஆய்வறிக்கை வெளியிட்டு பெரும் பரபரப்பை ஏற்படுத்தியது. இதனால் அதானி நிறுவனங்களின் பங்குகளும் கடுமையாக சரிந்துவிட்டன.

இதன்பின் முதலீட்டாளர்களின் நம்பிக்கையை மீண்டும் பெறுவதற்காக அதானி முயற்சித்து வருகிறது. புதிய முதலீடுகளை பெறுவது, கடன்களை அடைப்பது போன்ற முயற்சிகளில் அதானி ஈடுபட்டுள்ளது. இதற்காக சிங்கப்பூர், ஹாங் காங்கில் ஏற்கெனவே அதானி நிகழ்ச்சிகளை நடத்தி முதலீட்டாளர்களுக்கு விளக்கம் அளித்துள்ளது.

மேலும், பங்குகளை வைத்து பெற்ற 7374 கோடி ரூபாய் கடன்களையும் அடைத்துவிட்டதாக அதானி குழுமம் தெரிவித்தது. இதுபோக அமெரிக்காவை சேர்ந்த GQG Partners நிறுவனம் அதானி நிறுவனங்களில் 15000 கோடி ரூபாயை முதலீடு செய்துள்ளது.

இந்நிலையில், சிங்கப்பூர் மற்றும் ஹாங் காங்கை தொடர்ந்து லண்டனில் முதலீட்டாளர்களுக்கான நிகழ்ச்சியை அதானி குழுமம் நடத்தியது. அப்போது, பங்குகளை வைத்து பெற்ற அனைத்து கடன்களும் அடைக்கப்பட்டுவிட்டதாக முதலீட்டாளர்களிடம் அதானி குழுமம் தெரிவித்துள்ளது.

ஏசிசி, அம்புஜா சிமெண்ட்ஸ் ஆகிய சிமெண்ட் நிறுவனங்களை அதானி குழுமம் சில மாதங்களுக்கு முன் வாங்கியது. இந்நிறுவனங்களை வாங்குவதற்காக பெற்ற கடன்களை அதானி குழுமம் அடைத்துவிட்டதாக கூறப்படுகிறது.

லண்டன் மட்டுமல்லாமல் துபாய் மற்றும் அமெரிக்க நகரங்களிலும் முதலீட்டாளர்களின் நம்பிக்கையை பெறுவதற்காக அதானி குழுமம் நிகழ்ச்சிகளுக்கு ஏற்பாடு செய்துள்ளது. தற்போதைய நிதிநிலை, வருமானம், கடன்கள் பற்றி முதலீட்டாளர்களுக்கு எடுத்துச் சொல்லி அவர்களின் நம்பிக்கையை பெறுவதே இதன் நோக்கம்.