வீட்டுக் கடன் வட்டி குறைப்பு... அரசு வங்கி அறிவிப்பு!

பண்டிகை சீசன் வந்துவிட்டதால் வாடிக்கையாளர்களுக்கு பல்வேறு சலுகைகளை வங்கிகள் அறிவிக்கத் தொடங்கிவிட்டன. அந்த வகையில் இந்தியாவின் மிகப் பெரிய பொதுத் துறை வங்கியான ஸ்டேட் பேங்க் ஆஃப் இந்தியா தனது வாடிக்கையாளர்களுக்கு வீட்டுக் கடனுக்கான சிறப்புத் திட்டத்தை சமீபத்தில் அறிவித்தது. இதன்படி, வீட்டுக் கடன்களுக்கான வட்டி விகிதம் 6.70 சதவீதமாகக் குறைக்கப்பட்டது. இதனால் வீட்டுக் கடன் வாங்குவோர் நிம்மதியடைந்தனர். வீடு கட்ட நினைப்பவர்கள் இந்த பண்டிகை சீசனில் குறைந்த வட்டிக்கு கடன் வாங்கிப் பயன்பெறலாம்.

இந்நிலையில், ஸ்டேட் பேங்க் ஆஃப் இந்தியா வங்கியைத் தொடர்ந்து மற்றொரு அரசு வங்கியான பஞ்சாப் நேஷனல் வங்கியும் தற்போது வீட்டுக் கடன்களுக்கான வட்டியைக் குறைப்பதாக அறிவித்துள்ளது. வீட்டுக் கடன்களுக்கான வட்டியை 0.50 சதவீதம் குறைத்து 6.60 சதவீதமாக வைத்துள்ளது. இது ரூ.50 லட்சத்துக்கு மேலான வீட்டுக் கடன்களுக்குப் பொருந்தும். பண்டிகை சீசனை முன்னிட்டு, வாடிக்கையாளர்களுக்கு சலுகை வழங்குவதற்காக 50 லட்சத்துக்குக் குறைவான கடன்களுக்கும் இதே வட்டிதான் என அறிவிக்கப்பட்டுள்ளது.

ஆதார் - பான் இணைப்பு கடைசி தேதி நீட்டிப்பு!
வாடிக்கையாளர்களின் கிரெடிட் ஸ்கோரைப் பொறுத்து கடன் தொகை மற்றும் வட்டி விகிதம் இருக்கும் எனவும் கூறப்பட்டுள்ளது. வீட்டுக் கடன் மட்டுமல்லாமல், தனிநபர் கடன், வாகனக் கடன் போன்றவற்றுக்கான சேவைக் கட்டணம் மற்றும் செயல்பாட்டுக் கட்டணங்களையும் இவ்வங்கி குறைத்துள்ளது. சமீபத்தில்தான் ரெப்போ வட்டியுடன் இணைக்கப்பட்ட கடன் விகிதத்தை 6.80 சதவீதத்திலிருந்து 6.55 சதவீதமாக பஞ்சாப் நேஷனல் வங்கி குறைத்திருந்தது. இந்நிலையில் தற்போது வீட்டுக் கடன்களுக்கான வட்டியில் பண்டிகை சீசன் சலுகை அறிவிப்பை வெளியிட்டுள்ளது.