எரிபொருள் சிக்கனம்; பசிபிக் கடல் வழியாக ஏர் இந்தியா விமான சேவை

ஏர் இந்தியா நிறுவனம், எரிபொருளை சேமிக்கும் விதமாக, பசிபிக் பெருங்கடல் வழியாக, அமெரிக்காவின் சான் பிரான்சிஸ்கோவுக்கு விமான சேவை மேற்கொள்ள திட்டமிட்டுள்ளது.

மத்திய அரசுக்குச் சொந்தமான ஏர் இந்தியா, மும்பை, ஷாங்காய் வழியாக, சான் பிரான்சிஸ்கோ நகருக்கு விமான சேவை மேற்கொண்டுவந்தது. எனினும், இதனால், கூடுதல் எரிபொருள் செலவு ஏற்படுவாகக் கூறி, இந்த சேவை நிறுத்தப்பட்டது. தற்சமயம், அட்லாண்டிக் கடல் வழியாக, டெல்லியில் இருந்து சான் பிரான்சிஸ்கோ விமான சேவை மேற்கொள்ளப்பட்டு வருகிறது.

இந்த விமான சேவை, அதிக தொலைவு கொண்டதாக உள்ளதென்றும், மணிக்கு 9,600 லிட்டர் மதிப்பிலான எரிபொருளை செலவிட நேரிடுகிறது என்றும் ஏர் இந்தியா தெரிவித்துவருகிறது. இதன்காரணமாக, புதிய விமானப் பாதையை கண்டுபிடிக்கும் பணிகளை மேற்கொண்டது.

தற்போது, டெல்லியில் இருந்து, இந்தியப் பெருங்கடல், தென்கிழக்காசிய நாடுகள் வழியாக, பசிபிக் கடல் மீது பறந்து, சான் பிரான்சிஸ்கோ செல்லும் வழி கண்டுபிடிக்கப்பட்டுள்ளது. இந்த வழியில், பசிபிக் கடல் மீது மட்டும் அதிகநேரம் பயணிக்க வேண்டும் என்றும், இதன் அடிப்படையில் விமான சேவையை நவீனப்படுத்த வேண்டும் என்றும் ஏர் இந்தியா தெரிவித்துள்ளது.

சாதகமான பருவ சூழல், பசிபிக் கடலில் நீடிக்கும்பட்சத்தில், விமான எரிபொருள் சேமிப்பு மட்டுமின்றி, 2 மணிநேரம் வரை காலவிரயம் ஆவதையும் சிக்கனப்படுத்த முடியும் என்றும் நிறுவனம் குறிப்பிட்டுள்ளது.