அட்சய திருதியை.. தங்கம் விலை உயர்ந்தாலும் ஏன் வாங்க வேண்டும்?

இன்று அட்சய திருதியை பண்டிகை கொண்டாடப்பட இருக்கிறது. அட்சய திருதியை என்றால் மக்கள் தங்கம் வாங்குவது வழக்கம். இந்தியர்களோ பல காலமாக தங்கத்தில் முதலீடு செய்து வருகின்றனர். கிராமப்புற மக்கள் முதல் நகர்ப்புற மக்கள் வரை அனைவருமே தங்கம் வாங்குகின்றனர்.

அட்சய திருதியை பண்டிகை நாளில் தங்கம் வாங்கினால் அது பல்கி பெருகி செல்வம் செழிக்கும் என்பது நம்பிக்கை. இதனால், அட்சய திருதியை அன்று மக்கள் நகை கடைகளில் திரண்டு தங்கம் வாங்குகின்றனர். இதுபோக வெள்ளி, பாத்திரங்கள் போன்ற பொருட்களையும் மக்கள் வாங்குவதுண்டு.

தற்போதைய சூழலில் தங்கத்தில் தொடர்ந்து முதலீடு செய்வதே பாதுகாப்பானதாக கருதப்படுகிறது. ஏனெனில், தங்கம் அந்தஸ்துக்கான ஒரு பொருளாக மட்டுமல்லாமல் பணவீக்கத்தை தாண்டி உயரக்கூடியதாகவும், பொருளாதார நெருக்கடி காலங்களில் பாதுகாப்பு அளிக்கக்கூடியதாகவும் இருக்கிறது.

தற்போதைய சூழலில் தங்கம் தொடர்ந்து உயர்ந்து வருகிறது. குறிப்பாக சொன்னால் கடந்த செப்டம்பர் மாதம் முதல் தங்கம் சுமார் 20% உயர்ந்துள்ளது. இதற்கு காரணம் உலக பொருளாதார சூழல்தான். குறிப்பாக அதிக பணவீக்கத்தை கட்டுப்படுத்த வட்டி விகிதம் உயர்த்தப்பட்டு வருகிறது.

வட்டி உயர்ந்தாலும் பணவீக்கம் பெரிதாக குறைந்ததாக தெரியவில்லை. மேலும் வங்கி துறையில் நெருக்கடி ஏற்பட்டுள்ளது மற்றொரு காரணமாக உள்ளது. அமெரிக்காவில் சிலிக்கான் வேலி வங்கி, சிக்னேச்சர் வங்கி போன்ற வங்கிகள் அண்மையில் திவாலாகின.

இதனால், மக்கள் பாதுகாப்பான சொத்துகளை தேடி ஓடுகின்றனர். இதன் காரணமாகவே சில வாரங்களாக தங்கம் கடகடவென உயர்ந்து புதிய உச்சங்களை தொட்டு வருகிறது. வரும் நாட்களில் தங்கத்தில் மேலும் முதலீடுகள் குவியும் என எதிர்பார்க்கப்படுகிறது. எனவே தங்கத்தில் தொடர்ந்து முதலீடு செய்வது பாதுகாப்பை தரும் என நிபுணர்கள் கருதுகின்றனர்.