Employees Paternity Leave: அசத்தும் ஜோமாட்டோ- குழந்தை பிறந்தால் ஆண், பெண் ஊழியர்களுக்கு 26 வாரம் விடுப்பு!

ஆன்லைன் உணவு வர்த்தகத்தில் இந்தியாவில் முன்னணியில் இருப்பது ஜோமாட்டோ நிறுவனம் ஆகும். இது சமீப காலமாக தனது ஊழியர்களுக்கு சலுகைகளை வாரி வழங்கி வருகிறது. அந்த வகையில் புதிய அறிவிப்பு ஒன்று, அந்நிறுவன ஊழியர்கள் கொண்டாட்டத்தில் ஆழ்த்தியுள்ளது.

அதாவது, குழந்தை பிறந்தால் ஜோமாட்டோ ஊழியர்கள் 26 வார விடுப்பு அளிக்கப்படும் என்று தெரிவிக்கப்பட்டுள்ளது. இது தாய் மற்றும் தந்தை என இருவருக்கும் பொருந்தும் என்று ஆச்சரிய அறிவிப்பை வெளியிட்டுள்ளது.

இந்த விடுப்பு சலுகை குழந்தை தத்தெடுக்கும் பெற்றோர்களுக்கும் பொருந்தும் என்று தெரிவித்துள்ளது. இதுதொடர்பாக ஜோமாட்டோவின் நிறுவனர் தீபிந்திர் கோயல் தனது பிளாக்கில் பதிவிட்டுள்ளார்.

அதில், ஜோமாட்டோ நிறுவன ஊழியர்கள் தனிப்பட்ட மற்றும் தொழில்ரீதியான விஷயங்கள் ஒன்றுக்கொன்று குறுக்கிட்டாலும், எந்தவித சமரசமும் இன்றி சிறப்பான பணியை வெளிப்படுத்தி வருகின்றனர். இந்திய சட்டத்தின் படி, தாய்க்கு 26 வார மகப்பேறு விடுப்பு கட்டாயம் வழங்கப்பட வேண்டும்.

ஆனால் தந்தைக்கு இதுபோன்ற விடுப்பு எதுவும் சட்டமாக இல்லை. நாட்டின் வேறெந்த நிறுவனமும் தாய், தந்தை என இருவருக்கும் விடுப்பு அளிக்கும் அம்சத்தைப் பெற்றிருக்க வில்லை. அந்த வகையில் மிகவும் சிறப்புக்குரிய நிறுவனமாக நாங்கள் விளங்குகிறோம் என்று கூறியுள்ளார்.