Amul vs Nandhini: அமுலுக்கு வந்த சோதனை.. நந்தினிக்கு மட்டும்தான் இங்க அனுமதி.. போர்க்கொடி தூக்கும் எதிர்கட்சிகள்!

குஜராத் பால கூட்டுறவு பால் சந்தைப்படுத்துதல் கூட்டமைப்பு, அதன் பிரபல பிராண்டான அமுல் பெயரில் பால், மற்றும் பால் சார்ந்த பொருட்களை பெங்களூரில் துவங்குவதாக ஏப்ரல் 8 அன்று அறிவித்தது.


அதனைத் தொடர்ந்து அந்த அறிவிப்பு இன்று பெங்களூரில் ஒரு பூதகரமான விஷயமாக மாறியுள்ளது. குறிப்பாக பெங்களூரில் ஆளும் கட்சியான பா.ஜா,காவின் எதிர்கட்சிகள் இந்த அறிவிற்பிற்கு எதிர்ப்பு தெரிவித்துள்ளனர்.

அதாவது குஜராத் பால் நிறுவனத்துடன் இணைந்து உள்ளூர் பால் விற்பனையான நந்தினி பாலை ஓரங்கட்ட ஆளும்கட்சி முயற்சிப்பதாகவும், அமுல் நிறுவனத்துடன் அரசும் இணைந்து இச்செயலை நடத்துவதாகவும் குற்றம் சாட்டியுள்ளனர்.

ஆனால் ஆளும் கட்சியின் முதல்வரான பசவராஜ் பொம்மை இதற்கு மறுப்பு தெரிவித்துள்ளார். மேலும் இந்த விவகாரத்தில் அரசியலை நுழைக்க வேண்டாம் எனவும் கேட்டுக் கொண்டுள்ளார்.

மேலும் டெல்லியில் முதல்வர் பசவராஜ் இடம் இந்த பிரச்சனை குறித்து நிரூபர்கள் கேட்ட கேள்விக்கு ” நந்தினி பாலுக்கு என்று தனிச்சிறப்பு இருக்கிறது. தரமான நிறுவனம் என்ற பெயர் நந்தினிக்கு உள்ளது. நந்தினி பால் மற்ற மாநிலங்களிலும் விற்பனை செய்யப்பட்டு வருகிறது. இன்னும் சில மாநிலங்களில் நந்தினி பால் விற்பனை செய்யவும் நடவடிக்கை எடுக்கப்படும்” எனக் கூறியுள்ளார்.

மேலும் அமுல் விவகாரத்தில் அரசியல் செய்ய வேண்டாம். இந்த விவகாரத்தில் எதிர்க்கட்சிகள் அரசியல் செய்வது சரியல்ல. மார்க்கெட்டில் நந்தினியை முன்னிலைப்படுத்தவும், அமுலை பின்னுக்கு தள்ளவும் தேவையான நடவடிக்கை எடுக்கப்படும் என்ற விளக்கமான பதிலையும் அவர் அளித்துள்ளார்.

அதனைத் தொடர்ந்து பெங்களூர் ஹோட்டல் சங்கங்களும் விவசாயிகளுக்கு ஆதரவு அளிக்கும் வகையில் நந்தினி பாலை மட்டுமே பயன்படுத்துவோம் என்றும் தெரிவித்துள்ளன.