இந்தியாவுக்கு வண்டியை திருப்பும் ஆப்பிள்.. ஐபோன் பிரியர்களுக்கு சர்பிரைஸ்!

ஆப்பிள் (Apple) நிறுவனம் முதல்முறையாக இந்தியாவில் (India) அதிக கவனம் செலுத்தும் வகையில் சர்வதேச பதவிகளில் சில மாற்றங்களை கொண்டுவருவதாக தகவல் வெளியாகியுள்ளது.

அமெரிக்காவை சேர்ந்த ஆப்பிள் நிறுவனம் ஐபோன், ஐபேட், ஏர்பாட்ஸ், ஐமேக் லேப்டாப் உள்ளிட்ட பல்வேறு பொருட்களை தயாரித்து உலகம் முழுவதும் விற்பனை செய்து வருகிறது. ஆப்பிள் நிறுவனங்களின் தயாரிப்புகளுக்கு உலகம் முழுவதும் விசுவாசமான வாடிக்கையாளர்கள் இருக்கின்றனர்.

எனினும், இந்தியாவில் ஆப்பிள் பெரிதாக கவனம் செலுத்துவதில்லை என்பது ஆப்பிள் வாடிக்கையாளர்கள் மத்தியில் பொதுவான கருத்தாக இருந்தது. இந்நிலையில், ஆப்பிள் நிறுவனம் இந்தியாவில் அதிக கவனம் செலுத்துவதற்கு சில நடவடிக்கைகளை எடுத்துள்ளது.

ஆப்பிள் நிறுவனத்தின் இந்தியா, மத்திய கிழக்கு, மத்திய தரைக்கடல், கிழக்கு ஐரோப்பா, ஆப்பிரிக்கா ஆகிய பகுதிகளுக்கான பிரிவின் துணைத் தலைவராக ஹியூஸ் அஸ்மான் பதவி வகித்து வந்தார். இவர் தற்போது பணி ஓய்வு பெற்றுவிட்டார்.

இதைத்தொடர்ந்து அந்த பதவிக்கு ஆப்பிள் இந்தியா பிரிவின் தலைவர் ஆஷிஷ் சவுதரிக்கு பதவி உயர்வு வழங்க ஆப்பிள் நிறுவனம் முடிவு செய்துள்ளது. மேலும், இந்தியாவில் விற்பனை விவரங்களையும் ஆப்பிள் நேரடியாக கண்காணிக்க முடிவு செய்துள்ளதாம். இதன் வாயிலாக இந்தியாவில் அதிக கவனம் செலுத்துவதற்கு ஆப்பிள் நிறுவனம் திட்டமிட்டுள்ளதாக கூறப்படுகிறது.

ஆப்பிள் நிறுவனத்துக்கு இந்தியா ஒரு முக்கிய சந்தையாக உள்ளது. ஏற்கெனவே ஆப்பிள் நிறுவனத்தின் ஒப்பந்ததாரர்களான ஃபாக்ஸ்கான், பெகாட்ரான், சால்காம்ப் போன்ற நிறுவனங்கள் சென்னை அருகே ஆலை அமைத்து ஐபோன் மற்றும் ஐபோன்களுக்கான உபகரணங்களை உற்பத்தி செய்து வருவது குறிப்பிடத்தக்கது.

இதுமட்டுமல்லாமல், சீனாவில் ஆப்பிள் தயாரிப்புகள் உற்பத்தியை குறைத்து இந்தியாவில் உற்பத்தியை அதிகப்படுத்தவும் ஆப்பிள் திட்டமிட்டு வருவதாக கூறப்படுகிறது.