விமான எரிபொருள் விலை குறைப்பு: டிக்கெட் விலை குறையுமா?

கடந்த இரண்டு மூன்று மாதங்களாகவே சர்வதேச அளவில் கொரோனா வைரஸ் பாதிப்பு தீவிரமாக உள்ளது. உலக நாடுகளின் பொருளாதார வளர்ச்சியும் நுகர்வுத் தேவையும் குறைந்துள்ளது. குறிப்பாக கச்சா எண்ணெய்க்கான தேவை குறைந்ததால் மிகப் பெரிய அளவில் விலை குறைந்துள்ளது. வரலாறு காணாத வகையில் கச்சா எண்ணெய் வீழ்ச்சியைச் சந்தித்துள்ளதால், அதன் எதிரொலியாக இந்தியாவில் பெட்ரோலியப் பொருட்களுக்கான விலையும் குறைந்தது. இந்நிலையில், விமான பொருளுக்கான விலையைக் குறைப்பதாகப் பொதுத் துறை எண்ணெய் நிறுவனங்கள் அறிவித்துள்ளன.

டெல்லியில் ஒரு கிலோ லிட்டர் விமான எரிபொருளின் விலை 23.2 சதவீத வீழ்ச்சியுடன் ரூ.22,544.75 ஆகக் குறைந்துள்ளது. இது முந்தைய விலையை விட ரூ.6,812.62 குறைவாகும். விமான எரிபொருள் விலை டெல்லியில் லிட்டருக்கு ரூ.22.54 ஆக உள்ளது. பெட்ரோல் விலை ரூ.69.59 ஆகவும், டீசல் விலை ரூ.62.29 ஆகவும் இருக்கிறது. பெட்ரோல் - டீசல் விலையுடன் ஒப்பிடும்போது விமான எரிபொருள் விலை மூன்றில் ஒரு பங்காகக் குறைந்துள்ளது. பிப்ரவரி மாதத்திலிருந்து ஆறு முறை விமான எரிபொருள் விலை குறைக்கப்பட்டுள்ள நிலையில், இந்த மாதத்தில்தான் மிகப் பெரிய அளவில் விலை குறைக்கப்பட்டுள்ளது.

தங்கம் விலை: நீடிக்கும் விலையேற்றம்!

பிப்ரவரி மாதத்தில் ஒரு கிலோ லிட்டர் விமான எரிபொருளின் விலை ரூ.64,323.76 ஆக இருந்த நிலையில், மூன்று மாதங்களில் ரூ.22,544.75 ஆகக் குறைந்திருக்கிறது. விமான எரிபொருளின் விலை குறைக்கப்பட்டிருந்தாலும் பெட்ரோல் - டீசல் விலையில் எந்த மாற்றமும் செய்யப்படவில்லை. ஏனெனில், இவற்றின் கலால் வரி லிட்டருக்கு 3 ரூபாய் வரையில் உயர்த்தப்பட்டதால் விலைக் குறைப்பு செய்யப்படவில்லை. தற்போது ஊரடங்கு உத்தரவால் விமானப் பயணம் முடங்கியுள்ள சமயத்தில் விமான எரிபொருள் விலை குறைந்துள்ளது. ஊரடங்கு தளர்ந்தவுடன் விமானப் பயணங்களுக்கான கட்டணமும் குறையும் என்று எதிர்பார்க்கப்படுகிறது.