பதஞ்சலி பங்குகள் பயங்கர சரிவு.. செபி அதிரடி நடவடிக்கை!

பாபா ராம்தேவின் பதஞ்சலி ஃபுட்ஸ் (Patanjali foods) நிறுவனத்தின் பங்கு விலை இன்று மளமளவென சரிந்துள்ளது.

யோகா சாமியார் பாபா ராம்தேவின் பதஞ்சலி ஃபுட்ஸ் நிறுவனம் செபி விதிமுறைகளை மீறியதற்காக பதஞ்சலி ஃபுட்ஸ் நிறுவனத்தின் புரமோட்டர் பங்குகளை பங்குச் சந்தைகள் முடக்கியுள்ளன. இதனால் இன்று பதஞ்சலி ஃபுட்ஸ் பங்கு விலை 5% சரிந்து 917 ரூபாய் அளவுக்கு குறைந்துவிட்டது.

பதஞ்சலி ஃபுட்ஸ் நிறுவனத்தில் அதன் புரமோட்டர்களுக்கு 80.82% பங்கு இருக்கிறது. எனினும், செபி விதிமுறைப்படி ஒரு நிறுவனத்தில் புரமோட்டர்களுக்கு 75% வரை மட்டுமே பங்கு இருக்க வேண்டும். பொது முதலீட்டாளர்களுக்கு 25% பங்கு இருக்க வேண்டும்.

இதன்படி பதஞ்சலி ஃபுட்ஸ் நிறுவனத்தில் புரமோட்டர்கள் பங்கை 75% ஆக குறைத்திருக்க வேண்டும். ஆனால், அதற்கான கால அவகாசம் தாண்டிய பிறகும் புரமோட்டர் பங்குகள் குறைக்கப்படவில்லை. இதையடுத்து பதஞ்சலி ஃபுட்ஸ் நிறுவனத்தின் புரமோட்டர் பங்குகளை இந்திய பங்குச் சந்தைகள் முடக்கியுள்ளன.

இதன்படி, பதஞ்சலி ஃபுட்ஸ் நிறுவனத்தின் 292.58 மில்லியன் புரமோட்டர் பங்குகளையும் பங்குச் சந்தைகள் முடக்கியுள்ளதாக நேற்று பதஞ்சலி ஃபுட்ஸ் நிறுவனம் பங்குச் சந்தையில் தாக்கல் செய்துள்ள அறிக்கையில் தெரிவித்துள்ளது.

செபி விதிமுறைகளை கடைப்பிடிக்காததற்காகவே பங்குச் சந்தைகள் பதஞ்சலி ஃபுட்ஸ் நிறுவனத்தின் புரமோட்டர் பங்குகளை முடக்கியுள்ளன. இத்தகவல் வெளியானதை தொடர்ந்து இன்று பதஞ்சலி ஃபுட்ஸ் பங்கு விலை 5% சரிந்து 917 ரூபாய் அளவுக்கு குறைந்துவிட்டது.

புரமோட்டர் பங்குகளை முடக்கியதால் நிறுவனத்தின் ஒட்டுமித்த நிதி செயல்பாடுகள் பாதிக்கப்படாது எனவும் பதஞ்சலி நிறுவனம் தெரிவித்துள்ளது. சில மாதங்களில் செபி விதிமுறைகளின்படி புரமோட்டர் பங்குகள் குறைக்கப்படும் என்று பதஞ்சலி தெரிவித்துள்ளது.