ஜீன்ஸ் ஆடைகளை அறிமுகம் செய்ய பாபா ராம்தேவ் திட்டம்

சர்வதேச நிறுவனங்களுக்குப் போட்டியாக, உள்நாட்டிலேயே மலிவான விலையில் ஜீன்ஸ் ஆடைகளை தயாரித்து, விற்க உள்ளதாக, பாபா ராம்தேவ் தெரிவித்துள்ளார்.

யோகா குருவான பாபா ராம்தேவ், பதஞ்சலி என்ற பெயரில் அன்றாட பயன்பாட்டுப் பொருட்கள் வர்த்தகம் மேற்கொண்டுள்ளார். இந்த நிறுவனம், பற்பசை தொடங்கி, குளியல் சோப்கள் வரை பல்வேறு வகையான மூலிகைகளில் தயாரிக்கப்படும் பொருட்களை விற்பனை செய்கிறது. கடந்த நிதியாண்டில் மட்டும் பதஞ்சலி நிறுவனத்தின் விற்பனை வருமானம் ரூ.5000 கோடிக்கும் அதிகமாக இருந்தது.

நடப்பு நிதியாண்டில், ரூ.10,000 கோடி வரை வருமானம் ஈட்ட பதஞ்சலி இலக்கு நிர்ணயித்துள்ளது. இந்நிறுவனத்தின் வருகையால், ஹிந்துஸ்தான் யுனிலீவர், ஐடிசி உள்ளிட்ட முன்னணி நிறுவனங்களின் வர்த்தகம் பெரும் சரிவை சந்தித்துள்ளது.

இந்நிலையில், பதஞ்சலி இயற்கை பொருட்கள் தயாரிப்பை பின்பற்றி, பரிதான் என்ற பெயரில், ஆடை தயாரிப்பிலும் கால்பதிக்க, பாபா ராம்தேவ் முடிவு செய்துள்ளார். மலிவான விலையில் ஜீன்ஸ் உள்ளிட்ட அனைத்து வகையான ஆடைகளும் தயாரித்து, இந்தியா மட்டுமின்றி, சர்வதேச நாடுகளிலும் விற்பனை செய்யப் போவதாக, அவர் தெரிவித்துள்ளார்.

ஆடை தயாரிக்கும் தொழிற்சாலை நிறுவும் பணியில் தற்போது ஈடுபட்டுள்ளதாகவும் ராம்தேவ் கூறியுள்ளார். இதன்மூலமாக, ஜீன்ஸ் சந்தையில் நிலவும் பன்னாட்டு நிறுவனங்களின் ஆதிக்கத்தை முறியடிக்கப் போவதாகவும் அவர் சவால் விடுத்துள்ளார்.