சரவணா ஸ்டோர்ஸ் பார்த்துதான் பிக் பஜார் தொடங்கினேன்.. மனம் திறந்த தொழிலதிபர் கிஷோர் பியானி

சென்னையில் உள்ள சரவணா ஸ்டோர்ஸ் (Saravana Stores) வணிக வளாகத்தை பார்த்த பிறகுதான் பிக் பஜார் (Big Bazaar) நிறுவனத்தை தொடங்க விரும்பியதாக ஃபியூச்சர் குரூப் நிறுவனத்தின் நிறுவனர் கிஷோர் பியானி (Kishore Biyani) தெரிவித்துள்ளார்.

ஃபியூச்சர் குரூப் (Future Group) நிறுவனத்தின் நிறுவனர் கிஷோர் பியானி இந்திய ரீடெய்ல் துறையில் புகழ்பெற்ற தொழிலதிபர். இவர் தொடங்கிய பிக் பஜார் நிறுவனம் இந்தியா முழுவதும் பொதுமக்களிடம் நல்ல வரவேற்பை பெற்றன.

எனினும் கடன் சுமை அதிகமாகிவிட்டதாலும், கொரோனா காலகட்டத்தின்போது நிதி நெருக்கடி அதிகரித்துவிட்டதாலும் கிஷோர் பியானி தனது நிறுவனத்தை முகேஷ் அம்பானியின் ரிலையன்ஸ் ரீடெய்ல் நிறுவனத்திடம் 24,713 கோடி ரூபாய்க்கு விற்பனை செய்துவிட்டார்.

இந்நிலையில், Zerodha நிறுவனர் நித்தின் காமத், உடான் நிறுவனத்தின் சுஜீத் குமார், மீஷோ நிறுவனத்தின் விதித் ஆத்ரே ஆகியோருடன் பாட்காஸ்ட் உரையாடல் நிகழ்ச்சியில் கிஷோர் பியானி பங்கேற்று தனது தொழில் அனுபவங்கள் உள்ளிட்ட பல்வேறு சுவாரஸ்ய தகவல்களை பகிர்ந்துகொண்டார்.

அப்போது, சென்னையில் இருந்த சரவணா ஸ்டோர்ஸ் வணிக வளாகத்துக்கு சென்றபோது அங்கு ஒரே இடத்தில் எல்லா பொருட்களும் விற்பனை செய்யப்பட்டதை கண்டதாகவும், அதுதான் பிக் பஜார் தொடங்குவதற்கு உந்துசக்தியாக இருந்ததாகவும் கிஷோர் பியானி தெரிவித்துள்ளார்.

இதுமட்டுமல்லாமல், கூட்டத்தை சமாளிப்பது எப்படி என்பதை திருப்பதி கோயில் நிர்வாகத்தை பார்த்து கற்றுக்கொண்டதாகவும் கிஷோர் பியானி தெரிவித்துள்ளார். இதுகுறித்து அவர், “பிக் பஜார் ஸ்டோர்களுக்கு நிறைய கூட்டம் வரும். அப்போது, கூட்டத்தை எப்படி நிர்வகிப்பது என புரிந்துகொள்ள திருப்பதி கோயிலுக்கு சென்றோம்” என்று தெரிவித்துள்ளார்.