சீனியர் சிட்டிசன்கள் ஏமாற்றம்.. ரிசர்வ் வங்கி முடிவால் கவலை!

ரிசர்வ் வங்கியின் கொள்கை கூட்டம் ஏப்ரல் 3ஆம் தேதி ரிசர்வ் வங்கி ஆளுநர் சக்திகந்தா தாஸ் தலைமையில் தொடங்கி இன்று முடிவடைந்தது. இதைத்தொடர்ந்து கொள்கை கூட்டத்தின் முடிவுகளை சக்திகந்தா தாஸ் வெளியிட்டார்.

2022 மே மாதம் முதல் ரிசர்வ் வங்கி தொடர்ந்து வட்டி விகிதத்தை உயர்த்திக்கொண்டே வருகிறது. தற்போது ரெப்போ வட்டி 6.50% ஆக இருக்கிறது. இந்நிலையில், ரெப்போ வட்டி விகிதத்தில் எந்த மாற்றமும் இல்லை என ரிசர்வ் வங்கி தெரிவித்துள்ளது.

ரெப்போ வட்டி விகிதம் உயர்த்தப்பட்டால் வங்கிகள் வைப்பு நிதி (FD) திட்டத்துக்கு வட்டி விகிதத்தை உயர்த்துவார்கள். எனவே, ரெப்போ வட்டி விகிதம் உயர்வு FD முதலீட்டாளர்களுக்கு பலனளிக்கும்.

FD திட்டங்களில் சீனியர் சிட்டிசன்களே அதிகளவில் முதலீடு செய்து வருகின்றனர். ஓய்வுக்காலத்தில் பாதுகாப்பான முதலீடு என்பதால் FD திட்டங்களில் சீனியர் சிட்டிசன்கள் முதலீடு செய்கின்றனர். வங்கிகளும் FD திட்டங்களில் சீனியர் சிட்டிசன்களுக்கு ஸ்பெஷலாக கூடுதல் வட்டி வழங்குகின்றன.

இந்நிலையில், மீண்டும் ரெப்போ வட்டி விகிதம் அதிகரிக்கும் என சீனியர் சிட்டிசன்கள் பெரிதும் எதிர்பார்த்த நிலையில் ரிசர்வ் வங்கி வட்டி விகிதத்தை உயர்த்தாமல் நிறுத்தியுள்ளது. இது சீனியர் சிட்டிசன்களுக்கு ஏமாற்றம் அளிக்கும் வகையில் அமைந்துள்ளது.