ஒரே நாளில் ரூ.48000 கோடி போச்சு.. உலக பணக்காரர்கள் பட்டியலில் அதானி சரிவு!

அதானி குழுமத்தின் தலைவர் கவுதம் அதானி இந்தியாவிலும், ஆசியாவிலும் மிகப்பெரிய பணக்காரராக இருக்கிறார். மேலும், உலக பணக்காரர்கள் பட்டியலில் மூன்றாம் இடத்தில் இருந்து வந்தார். இந்நிலையில், நேற்று ஒரே நாளில் அவரது சொத்து மதிப்பு தாறுமாறாக சரிந்துவிட்டது. இதனால், உலக பணக்காரர்கள் பட்டியலில் 4ஆம் இடத்துக்கு தள்ளப்பட்டுள்ளார் அதானி.

அமெரிக்காவை சேர்ந்த ஹிண்டென்பர்க் (Hindenburg Research) நிறுவனம் அதானி குழுமம் மீது பல்வேறு குற்றச்சாட்டுகளை முன்வைத்து ஆய்வு ரிப்போர்ட் ஒன்றை நேற்று வெளியிட்டுள்ளது. அதில், அதானி நிறுவனங்களின் பங்குகள் கையாளப்பட்டிருப்பதாகவும், அதானி குழுமம் கணக்கு மோசடிகளில் ஈடுபட்டிருப்பதாகவும் தெரிவித்துள்ளது.

இந்த அறிக்கை வெளியானதை தொடர்ந்து நேற்று ஒரே நாளில் அதானி நிறுவனங்களின் பங்குகள் கடும் வீழ்ச்சியை சந்தித்துள்ளன. நேற்று (ஜனவரி 25) அதானி நிறூவனங்களின் சந்தை மதிப்பு 96672 கோடி ரூபாய் சரிந்துள்ளது. ஜனவரி 24ஆம் தேதி 19.20 லட்சம் கோடி ரூபாயாக இருந்த அதானி நிறுவனங்களின் சந்தை மதிப்பு ஜனவரி 25ஆம் தேதி 18.23 லட்சம் கோடி ரூபாயாக சரிந்துவிட்டது.

சுந்தர் பிச்சைக்கு சம்பளம் கட்.. கூகுள் சீனியர்களுக்கு திடீர் செக்!
நேற்று பங்கு வர்த்தகத்தில் அதானி எண்டர்பிரைசஸ் பங்கு விலை 1.54% சரிந்துவிட்டது. அதானி கிரீன் எனர்ஜி, அதானி போர்ட்ஸ், அதானி பவர், அதானி டோட்டல் கேஸ், அதானி ட்ரான்ஸ்மிஷன், அதானி வில்மர் ஆகிய பங்குகள் 5% தொடங்கி 9% வரை வீழ்ச்சி அடைந்துள்ளன.

இதுமட்டுமல்லாமல் அதானி குழுமம் அண்மையில் விலைக்கு வாங்கிய ஏசிசி, அம்புஜா சிமெண்ட்ஸ், என்டிடிவி ஆகிய நிறுவனங்களின் பங்குகளும் முறையே 7.26%, 7.71%, 4.98% சரிந்துள்ளன.

அதானி எண்டர்பிரைசஸ் நிறுவனத்தின் 20,000 கோடி ரூபாய் மதிப்பிலான பங்குகளை FPO வாயிலாக விற்பனை செய்வதற்கு நடவடிக்கைகள் தீவிரமாகி வருகிறது. இந்த சூழலில் ஹிண்டென்பர்க் ரிப்போர்ட் வெளியாகி அதானி பங்குகளை வீழ்ச்சி அடைய செய்துள்ளது.

நேற்று அதானி பங்குகள் சரிந்ததால், உலக பணக்காரர்கள் பட்டியலில் கவுதம் அதானி மூன்றாம் இடத்தில் இருந்து நான்காம் இடத்துக்கு தள்ளப்பட்டுள்ளார். அவரது சொத்து மதிப்பு நேற்று ஒரே நாளில் சுமார் 48000 கோடி ரூபாய் சரிந்துள்ளது. இப்போது மூன்றாம் இடத்துக்கு அமேசான் நிறுவனத்தின் தலைவர் ஜெப் பெசோஸ் முன்னேறியுள்ளார்.

Bloomberg Billionaires Index பட்டியலின்படி, கவுதம் அதானியின் சொத்து மதிப்பு 113 பில்லியன் டாலராக குறைந்துள்ளது. உலக பணக்காரர்கள் பட்டியலில் முதலிடத்தில் பெர்னார்ட் அர்னால்ட் (190 பில்லியன் டாலர்), இரண்டாம் இடத்தில் எலான் மஸ்க் (146 பில்லியன் டாலர்), மூன்றாம் இடத்தில் ஜெப் பெசோஸ் (120 பில்லியன் டாலர்), நான்காம் இடத்தில் கவுதம் அதானி (113 பில்லியன் டாலர்), ஐந்தாம் இடத்தில் பில் கேட்ஸ் (111 பில்லியன் டாலர்) ஆகியோர் உள்ளனர்.