3 டூ 21.. உலக பணக்காரர்கள் பட்டியலில் ரிவர் கியரில் போகும் அதானி

அதானி பங்குகள் தொடர்ந்து சரிந்து வரும் நிலையில், அதானி குழுமத்தின் தலைவர் கவுதம் அதானி உலக பணக்காரர்கள் பட்டியலில் தொடர்ந்து சரிந்துகொண்டே வருகிறார். இந்நிலையில், உலக பணக்காரர்கள் பட்டியலில் 3ஆம் இடத்தில் இருந்த கவுதம் அதானி இப்போது 21ஆம் இடத்துக்கு தள்ளப்பட்டுள்ளார்.

அதானி குழுமம் கணக்கு மோசடி உள்ளிட்ட பல்வேறு மோசடிகளில் ஈடுபட்டுள்ளதாக அமெரிக்காவை சேர்ந்த ஹிண்டென்பர்க் ஆய்வு நிறுவனம் ஜனவரி 24ஆம் தேதி ஆய்வறிக்கை ஒன்றை வெளியிட்டது. அதில், அதானி குழுமத்துக்கு 88 கேள்விகளையும் முன்வைத்துள்ளது.

இதையடுத்து, அதானி குழுமத்தின் அனைத்து பங்குகளுமே மிக மோசமாக சரிந்து வருகின்றன. இன்று மட்டும் அதானி எண்டர்பிரைசஸ் பங்கு 35% வரை சரிந்துவிட்டது. ஹிண்டென்பர்க் அறிக்கை வெளியான பிறகு மட்டும் அதானி எண்டர்பிரைசஸ் பங்கு சுமார் 70% மேல் சரிந்துவிட்டது.

அதானி விவகாரம்.. உச்ச நீதிமன்றத்தில் விசாரணைக்கு பொது நல வழக்கு!
இதுமட்டுமல்லாமல், அதானி பத்திரங்களின் மதிப்பும் சரிந்துவிட்டது. இதனால், அதானி பத்திரங்களை இனி பிணையாக ஏற்க முடியாது என சிட்டிகுரூப், கிரெடிட் சூயிஸ் போன்ற சர்வதேச வங்கிகள் தடாலடியாக முடிவெடுத்துவிட்டன. இதுபோக, அதானி பங்குகளை தேசிய பங்குச் சந்தையும், மும்பை பங்குச் சந்தையும் கூடுதல் கண்காணிப்பு பட்டியலில் (ASM) வைத்துள்ளன.

அதானி பங்குகள் தொடர் சரிவால் அதானி குழுமத்தின் தலைவர் கவுதம் அதானியின் சொத்து மதிப்பு சரிந்துகொண்டே வருகிறது. ஜனவரி 24ஆம் தேதி வரை உலகின் 3ஆவது மிகப்பெரிய பணக்காரராக கவுதம் அதானி முன்னணியில் இருந்தார்.

ஹிண்டென்பர்க் அறிக்கை வெளியானதை தொடர்ந்து படிப்படியாக சரிந்து இப்போது உலக பணக்காரர்கள் பட்டியலில் 21ஆவது இடத்துக்கு தள்ளப்பட்டுள்ளார். Bloomberg பணக்காரர்கள் பட்டியலின்படி கவுதம் அதானி இதுவரை 59.1 பில்லியன் டாலர் சொத்து மதிப்பை இழந்துள்ளார்.