சிங்கப்பூரில் கடையை போட்ட TVS.. இனி இதெல்லாம் கிடைக்கும்!

சென்னையை தலைமையிடமாக கொண்டு இயங்கி வரும் டிவிஎஸ் (TVS) நிறுவனம் மற்ற நாடுகளுக்கும் தொழிலை விரிவாக்கம் செய்ய நடவடிக்கை எடுத்து வருகிறது. இதன் ஒரு பகுதியாக, சிங்ப்பூரில் உள்ள UBI Industrial Estate பகுதியில் டிவிஎஸ் நிறுவனம் தனது முதல் ஷோரூமை தொடங்கியுள்ளது.

இதை டிவிஎஸ் நிறுவனம் அனுபவ மையம் (TVS Experience Centre) என அழைக்கிறது. இந்த அனுபவ மையம் வாயிலாக டிவிஎஸ் நிறுவனம் தனது ஃப்ளாக்‌ஷிப் பைக்கான Apache RR310, Apache RTR உள்ளிட்ட பல்வேறு பிரீமியம் வாகனங்களை வழங்குகிறது.

ரேசிங் பைக், பர்ஃபார்மன்ஸ் பைக், தனிநபர் பயண வாகனங்கள், டெலிவரி வாகனங்கள் என பல ரகங்களில் இருசக்கர வாகனங்களை சிங்கப்பூரில் உள்ள அனுபவ மையம் வாயிலாக விற்பனை செய்கிறது டிவிஎஸ் நிறுவனம். இதுமட்டுமல்லாமல், வாகனங்களுக்கான சர்வீஸ் வசதிகளும் உள்ளன.

மேலும் வாகனங்களுக்கு தேவையான ஸ்பேர் பார்ட்ஸ் மற்றும் பல்வேறு பொருட்களையும் இந்த அனுபவ மையம் வாயிலாக வாடிக்கையாளர்களால் வாங்க முடியும்.

இந்தியாவில் கடையை சாத்தும் அமேசான்.. வெளியான ஷாக்கிங் நியூஸ்!
தற்போது டிவிஎஸ் Apache சீரிஸ் வாகனங்கள் ரேசிங் போட்டிகளுக்காக தயாரிக்கப்படுகின்றன. டிவிஎஸ் நிறுவனத்துக்கு மோட்டார்ஸ்போர்ட்ஸ் துறையில் 40 ஆண்டு அனுபவம் உள்ளது. 2005ஆம் ஆண்டில் Apache சீரிஸை டிவிஎஸ் அறிமுகப்படுத்தியது.

சுமார் 80 நாடுகளுக்கு டிவிஎஸ் தனது Apache சீரிஸ் வாகனங்களை ஏற்றுமதி செய்து வருகிறது. உலகம் முழுவதும் சுமார் 48 லட்சத்துக்கும் மேற்பட்ட வாடிக்கையாளர்கள் தங்களுக்கு இருப்பதாக டிவிஎஸ் நிறுவனம் கூறுகிறது.

சிங்கப்பூரில் டிவிஎஸ் அனுபவ மையத்தை தொடங்கி வைக்கும் நிகழ்வில் டிவிஎஸ் நிருவனத்தின் சர்வதேச தொழில் பிரிவு துணைத் தலைவர் ராகுல் நாயக் பேசியபோது, “சர்வதேச தொழில் கட்டமைப்பதில் பல ஆண்டு அர்ப்பணிப்புடன், உலகளவில் வாடிக்கையாளர்களின் தேவையை டிவிஎஸ் பூர்த்தி செய்து வருகிறது. இதில் சிங்கப்பூரில் மையம் தொடங்கியுள்ளதன் வாயிலாக இன்னொரு படி மேலே சென்றுள்ளோம்” என்று தெரிவித்துள்ளார்.

சிங்கப்ப்பூரில் சேவை வழங்குவதற்காக டிவிஎஸ் நிறுவனம் Chong Aik குழுமத்தை சேர்ந்த Motorsport Pte Ltd நிறுவனத்துடன் கூட்டணி அமைத்துள்ளது. இந்நிறுவனம் சிங்கப்பூரில் டிவிஎஸ் நிறுவனத்தின் விநியோகராக இயங்கும்.

இந்நிறுவனத்துக்கு சிங்கப்பூரில் 6 சில்லறை வர்த்தக மையங்களும் 8 கிடங்குகளும் உள்ளன. இதுபோக 40க்கும் மேற்பட்ட பிராண்டுகளின் உதிரி பாகங்கள், உடைகள், மோட்டார்சைக்கிள் உபகரணங்களை இந்நிறுவனம் விற்பனை செய்து வருகிறது.