சென்னையில் மீண்டும் ரியல் எஸ்டேட் வளர்ச்சி.. குவிந்த 2.88 பில்லியன் டாலர் முதலீடு!

இந்தியாவில் ரியல் எஸ்டேட் துறை குறித்த ஆய்வறிக்கையை CBRE நிறுவனம் வெளியிட்டுள்ளது. இந்த அறிக்கையின்படி, 2018 முதல் 2022 வரையிலான காலகட்டத்தில் சென்னையில் ரியல் எஸ்டேட் துறையில் 2.88 பில்லியன் டாலர் முதலீடுகள் குவிந்துள்ளன.

2018-22 காலகட்டத்தில் இந்தியா முழுவதும் ரியல் எஸ்டேட் துறையில் 43.3 பில்லியன் டாலர் முதலீடு குவிந்துள்ளது. அதில் சென்னையில் 2.88 பில்லியன் டாலர் முதலீடு வந்துள்ளது. சென்னையில் நிலம் கையகப்படுத்துவதற்கு மட்டும் 0.9 பில்லியன் டாலர் முதலீடு குவிந்துள்ளது.

அடுத்த இரண்டு ஆண்டுகளில் இந்திய ரியல் எஸ்டேட் துறையில் 16 பில்லியன் முதல் 17 பில்லியன் டாலர் வரை முதலீடுகள் குவியும் என எதிர்பார்ப்பதாகவும் CBRE நிறுவனம் தெரிவித்துள்ளது.

பழைய மற்றும் தற்போதைய ட்ரெண்டுகளை வைத்து பார்க்கும்போது அலுவலக இடத்துக்கான பிரிவில் ஏராளமான முதலீடுகள் குவியும் என எதிர்பார்ப்பதாகவும் இந்த அறிக்கை கூறுகிறது. இதுபோக டேட்டா செண்டர்களிலும் (Data centres) முதலீடுகள் அதிகரிக்கும் என எதிர்பார்ப்பதாக இந்த அறிக்கை கூறுகிறது.

2018ஆம் ஆண்டு முதல் வீடுகளுக்குதான் அதிக வளர்ச்சி ஏற்பட்டுள்ளது. 2018ஆம் ஆண்டு முதல் கையகப்படுத்தப்பட்ட நிலங்களில் 37% வீடுகளுக்கும், குடியிருப்புகளுக்குமே பயன்படுத்தப்பட்டுள்ளன.

2022ஆம் ஆண்டில் ரியல் எஸ்டேட் நிறுவனங்கள் 900 ஏக்கருக்கு மேல் நிலம் கையகப்படுத்தியுள்ளன. இதில் 31% நிலம் டெல்லி - என்சிஆர் பகுதியில் கையகப்படுத்தப்பட்டுள்ளன. மும்பையில் 14% நிலம் கையகப்படுத்தப்பட்டுள்ளன.

அடுத்தடுத்த இடங்களில் பெங்களூருவில் 9% நிலம் கையகப்படுத்தப்பட்டுள்ளது. மேலும் ஹைதராபாத்தில் 7% நிலம் கையகப்படுத்தப்பட்டுள்ளது.