சீனாவுக்கே இந்த நிலைமையா.. அதிர வைக்கும் சரிவு!

கடந்த பிப்ரவரி மாதத்துக்கு பின் முதல்முறையாக சீனாவின் ஏற்றுமதி மே மாதத்தில் சரிவடைந்துள்ளது.

உலகளவில் மிகப்பெரிய பொருளாதார சக்தியாக சீனா முன்னணியில் உள்ளது. உலகின் உற்பத்தி மையமாக திகழும் சீனா குண்டூசி முதல் கார் வரை எல்லா பொருட்களையும் உற்பத்தி செய்து உலகம் முழுவதும் ஏற்றுமதி செய்து வருகிறது. இதனால் மிகப்பெரிய ஏற்றுமதி சக்தியாகவும் சீனா முன்னிலையில் உள்ளது.

இந்நிலையில், கடந்த மே மாதத்தில் சீனாவின் ஏற்றுமதி 7.5 சதவீதம் சரிவடைந்துள்ளது பெரும் அதிர்ச்சியை ஏற்படுத்தியுள்ளது. சீனாவின் ஏற்றுமதி சரிந்துள்ளது உலக பொருளாதார மந்தநிலைக்கான மற்றொரு முக்கிய அறிகுறியாகவும் பார்க்கப்படுகிறது.

மே மாதத்தில் சீனாவின் ஏற்றுமதி முந்தைய மாதத்தை காட்டிலும் 7.5 சதவீதம் சரிந்துள்ளது. முந்தைய ஏப்ரல் மாதத்தில் சீனாவின் ஏற்றுமதி 8.5 சதவீதம் உயர்ந்தது குறிப்பிடத்தக்கது. மே மாதத்தில் சீனாவின் இறக்குமதியும் 4.5 சதவீதம் சரிந்துள்ளது.

உலக பொருளாதார மந்தநிலை, கடும் பணவீக்கம் போன்றவை சீனாவின் ஏற்றுமதி சரிவுக்கான காரணங்களாக பார்க்கப்படுகின்றன. இருப்பினும், அமெரிக்கா - சீனா இடையே நீடிக்கும் மோதல் போக்கு சீனாவின் ஏற்றுமதி சரிந்ததற்கு முக்கிய காரணமாக உள்ளது.

கடந்த மார்ச் மாதத்துக்கு முன்பு சீனாவின் ஏற்றுமதி தொடர்ந்து ஐந்து மாதங்களாக சரிவடைந்தன. இதற்கு, கொரோனா பாதிப்பால் விதிக்கப்பட்ட ஊரடங்குகளும், அதனால் உற்பத்தி பாதிக்கப்பட்டதும் காரணமாக இருந்தது.

பின்னர் மார்ச், ஏப்ரல் மாதங்களில் சீனாவின் ஏற்றுமதி அதிகரித்தது. அதிலும் ஏப்ரல் மாதம் சீனாவின் ஏற்றுமதி 8.5 சதவீதம் உயர்ந்தது. இந்நிலையில், மே மாதத்தில் மீண்டும் சீனாவின் ஏற்றுமதி 7.5 சதவீதம் சரிந்துள்ளது.