பஞ்சு விலை உயர்வு.. வேதனையில் பஞ்சாலைகள்.. மகிழ்ச்சியில் விவசாயிகள்!

விலைவாசி உயர்வு பட்டியலில் இப்போது பஞ்சும் உயர்ந்துள்ளது. அதுவும் மிகப் பெரிய விலையேற்றம். 2022ஆம் ஆண்டில் மட்டும் பஞ்சு விலை 40 சதவீதம் வரையில் உயர்ந்துள்ளது. இதனால் பஞ்சு நூற்பாலைகளும் ஜவுளி உற்பத்தியாளர்களும் நெருக்கடியில் சிக்கியுள்ளனர். உற்பத்திச் செலவுகள் அதிகரித்து அவர்களைப் பாடாய் படுத்துவதாக வேதனை தெரிவித்துள்ளனர்.

பஞ்சு விலை உயர்வு காரணமாக சில நூற்பாலைகள் இயங்குவதை நிறுத்தியுள்ளன. இன்னும் சில ஆலைகள் பகுதியளவு மட்டுமே இயங்குகின்றன. இதே நிலை நீடித்தால் பருத்திக்கான நுகர்வு 29 லட்சம் மூட்டையிலிருந்து (கேண்டி) 19 லட்சம் மூட்டைகளாகக் குறைந்துவிடும் என்று சந்தை வல்லுநர்கள் கணித்துள்ளனர். பஞ்சு விலை உயர்ந்துள்ள இந்த நேரத்தில், பஞ்சு வரத்தும் குறைந்துள்ளது கூடுதல் நெருக்கடியை ஏற்படுத்தியுள்ளது.

ஒரு ஆண்டுக்குள் பருத்தி விலை இரு மடங்கு அதிகரித்துவிட்டதால் அதைக் கட்டுப்படுத்த பருத்தி இறக்குமதி மீது இந்திய அரசு தடை விதிக்கும் என்று எதிர்பார்க்கப்படுகிறது. இந்த விவகாரம் குறித்து அரசிடம் முறையிட மூன்று பிரதிநிதிகளை மும்பை ஜவுளி ஆணையரிடம் தமிழ்நாடு நூற்பாலைகள் சங்கம் அனுப்பி வைத்துள்ளது. விரைவில் இதற்குத் தீர்வு கிடைக்கும் என்று எதிர்பார்க்கப்படுகிறது.

இந்தியாவின் ஒட்டுமொத்த பருத்தி உற்பத்தியில் தமிழகத்தின் பங்கு 40 சதவீதத்துக்கு மேல் உள்ளது. இங்குள்ள பருத்தி ஆலைகள் இப்போது வாரத்துக்கு 5 நாட்கள் மட்டுமே இயங்குகின்றன. அந்த அளவுக்கு நெருக்கடி ஏற்பட்டுள்ளது. பஞ்சு விலை உயர்வால் உற்பத்தி பாதிக்கப்பட்டு, ஜவுளி விலையும் கடுமையாக உயரும் என்று அஞ்சப்படுகிறது.

பருத்தி ஏற்றுமதியில் இந்தியா சாதனை!
பஞ்சு விலையைப் பொறுத்தவரையில், கேண்டி ஒன்றுக்கு 37,000 முதல் 45,000 வரை இருந்த விலை இப்போது ரூ.97,000 முதல் ரூ.1.04 லட்சம் வரை உயர்ந்துவிட்டது. இதன் விலை இன்னும் உயரும் என்று எதிர்பார்க்கப்படுகிறது.

பஞ்சு விலை உயர்வு ஆலைகளுக்கு நெருக்கடியை ஏற்படுத்தினாலும் விவசாயிகளுக்கு மகிழ்ச்சியை ஏற்படுத்தியுள்ளது. அவர்களுக்கு அதிக விலை கிடைக்கும். அதேநேரம், ஜவுளி விலை உயர்ந்தால் அது பொதுமக்களுக்கு பாதிப்பை ஏற்படுத்தும் என்று அஞ்சப்படுகிறது.