Adani: அதானி புது திட்டம்.. 790 மில்லியன் டாலர் கடன்களை அடைக்க முடிவு!

அதானி குழுமம் கடந்த ஜனவரி மாதம் முதலாகவே கடும் நெருக்கடியை சந்தித்து வருகிறது. இந்நிலையில், மார்ச் மாத இறுதிக்குள் 790 மில்லியன் டாலர் கடன்களை அடைப்பதற்கு அதானி குழுமம் திட்டமிட்டு வருவதாக தகவல் வெளியாகியுள்ளது.

அதானி குழுமம் கணக்கு மோசடி உள்ளிட்ட பல்வேறு மோசடிகளில் ஈடுபட்டுள்ளதாக ஜனவரி 24ஆம் தேதி அன்று அமெரிக்காவை சேர்ந்த ஹிண்டென்பர்க் ஆய்வு நிறுவனம் ஆய்வறிக்கை ஒன்றை வெளியிட்டது. இந்த ஒரு அறிக்கையால் அதானி குழுமம் இப்போது வரை நெருக்கடியை சந்தித்து வருகிறது.

இந்த அறிக்கை வெளியானதை தொடர்ந்து அதானி நிறுவனங்களின் பங்குகள் கடுமையாக சரிந்துவிட்டன. மேலும், உலக பணக்காரர்கள் பட்டியலில் 3ஆம் இடத்தில் இருந்த கவுதம் அதானி இப்போது 32ஆம் இடத்துக்கு தள்ளப்பட்டுள்ளார். அவரது சொத்து மதிப்பு இந்த ஆண்டில் மட்டும் இதுவரை 82.8 பில்லியன் டாலர் குறைந்துள்ளது.

ஜனவரி 25ஆம் தேதி முதல் அதானி குழும நிறுவனங்களின் பங்குகள் கடும் வீழ்ச்சி அடைந்துள்ளன. அதானி குழுமத்தின் சந்தை மதிப்பு 140 பில்லியன் டாலருக்கு மேல் சரிந்துள்ளது. ஹிண்டென்பர்க் முன்வைத்த குற்றச்சாட்டுகளை அதானி குழுமம் மறுத்துவிட்டது. இருப்பினும் அதானி பங்குகள் சரிந்து வருகின்றன.

மோசடி குற்றச்சாட்டுகள் ஒரு பக்கம் இருந்தாலும், அதானி குழுமம் அளவுக்கு மிஞ்சிய கடன்களில் இருப்பதே அதானி பங்குகள் சரிவதற்கு முக்கிய காரணம் என கூறப்படுகிறது. இதனால், முதலீட்டாளர்களின் நம்பிக்கையை பெறுவதற்காக கடன்களை அடைப்பதற்கு அதானி குழுமம் முயற்சித்து வருகிறது.

இந்நிலையில், மார்ச் மாத இறுதிக்குள் சுமார் 690 மில்லியன் டாலர் முதல் 790 மில்லியன் டாலர் அளவிலான கடன்களை அடைப்பதற்கு அதானி குழுமம் திட்டமிட்டுள்ளதாக தகவல் வெளியாகியுள்ளது. இதன் மூலம் முதலீட்டாளர்களின் நம்பிக்கையை மீண்டும் பெற முடியும் என அதானி குழுமம் நம்புகிறது.