கடனில் மிதக்கும் இந்தியா... பட்ஜெட்டில் தீர்வு கிடைக்குமா?

மத்திய நிதியமைச்சர் நிர்மலா சீதாராமன் தாக்கல் செய்யும் இரண்டாவது பட்ஜெட் இன்னும் சில தினங்களில் வெளியாகவுள்ள நிலையில் அதன் மீது அதிக எதிர்பார்ப்புகள் இருக்கின்றன. இந்தியப் பொருளாதார வளர்ச்சி மந்தமாக இருப்பதாகவும், நாட்டில் போதிய அளவில் வேலைவாய்ப்புகள் உருவாக்கப்படவில்லை எனவும், ஏர் இந்தியா, பிஎஸ்என்எல் உள்ளிட்ட பொதுத் துறை நிறுவனங்களின் வீழ்ச்சியைக் கூட மத்திய அரசால் தடுத்து நிறுத்த முடியவில்லை எனவும் பல்வேறு குற்றச்சாட்டுகள் மோடி அரசின் மீது இருக்கின்றன. இதுபோன்ற நெருக்கடியான சூழலில்தான் 2020-21 நிதியாண்டுக்கான மத்திய பட்ஜெட் பிப்ரவரி 1ஆம் தேதி தாக்கல் செய்யப்படவிருக்கிறது.

மொத்த உள்நாட்டு உற்பத்தி மற்றும் வருவாய் - கடன் தொடர்பான புள்ளி விவரங்களை உதாரணமாகக் கூறியுள்ள காங்கிரஸ் கட்சி, வளர்ச்சியை மேம்படுத்துவதற்கான சிறப்பு அறிவிப்புகள் மத்திய பட்ஜெட்டில் இடம்பெற்றிருக்க வேண்டும் என்று கேட்டுக்கொண்டுள்ளது. இதுகுறித்து காங்கிரஸ் கட்சியின் செய்தித் தொடர்பாளரான கௌரவ் வல்லப் பேசுகையில், “இந்தியர்களின் தனிநபர் கடன் 10.3 சதவீதம் உயர்ந்துள்ளது. இது தனிநபர் மொத்த உள்நாட்டு உற்பத்தி வளர்ச்சியை (5.3%) விட மூன்று மடங்கு அதிகமாக இருக்கிறது. இந்தியாவில் வேலைவாய்ப்பிலும், முதலீட்டிலும், வருமானத்திலும் வளர்ச்சி இல்லை. அப்படி இருக்கும்போது அதன் தாக்கத்தையும் கடன் சுமையையும் எவ்வாறு மக்களால் தாங்கிக்கொள்ள முடியும்?” என்று கேள்வி எழுப்பியுள்ளார்.

பட்ஜெட் 2020: விவசாயிகளுக்கு ஏதாவது கிடைக்குமா?

கடந்த ஐந்தாறு ஆண்டுகளில் இந்தியாவின் கடன் அதிகரித்திருக்கிறது. 2014 மார்ச் மாதத்தில் இந்தியாவின் கடன் ரூ.53.11 லட்சம் கோடியாக இருந்தது. அது 2019 செப்டம்பரில் ரூ.9101 லட்சம் கோடியாக உயர்ந்துவிட்டதாக காங்கிரஸ் தரப்பில் குற்றஞ்சாட்டப்பட்டுள்ளது. தேசிய அளவில் தனிநபர் கடன் 2014 மார்ச் மாதத்தில் ரூ.41,200 கோடியாக இருந்ததாகவும், அது 2019 செப்டம்பரில் ரூ.68,400 கோடியாக உயர்ந்துவிட்டதாகவும் புகார் கூறப்பட்டுள்ளது. நிலைமை இவ்வாறு இருப்பதால் இவற்றைச் சரிசெய்யும் வகையில் 2020 பட்ஜெட் இருக்க வேண்டும் என்று காங்கிரஸ் கட்சி வலியுறுத்தியுள்ளது.