EMI தொகை மேலும் உயரப்போகுதா? ரிசர்வ் வங்கி முடிவுக்கு காத்திருக்கும் கடனாளிகள்!

ரிசர்வ் வங்கியின் பணக் கொள்கை கூட்டம் இரண்டு மாதங்களுக்கு ஒரு முறை நடைபெறும். இதில், ரெப்போ வட்டி விகிதம் உள்பட ரிசர்வ் வங்கியின் கொள்கை முடிவுகள் எடுக்கப்படும்.

வங்கிகளுக்கு ரிசர்வ் வங்கி வழங்கும் கடன் தொகைக்கு ரெப்போ வட்டி விதிக்கப்படுகிறது. எனவே, ரெப்போ வட்டி உயர்த்தப்படும்போதெல்லாம் வங்கிகளில் கடன் திருப்பிச் செலுத்துவோருக்கு மாத EMI தொகை உயரும்.

பணவீக்கம் அதிகரிக்கும்போதெல்லாம் விலைவாசி உயர்வை கட்டுப்படுத்துவதற்கு ரிசர்வ் வங்கி ரெப்போ வட்டி விகிதத்தை உயர்த்துகிறது.

தற்போது ரெப்போ வட்டி விகிதம் 6.25% ஆக உள்ளது. கடைசியாக டிசம்பர் மாதம் நடைபெற்ற ரிசர்வ் வங்கி கொள்கை கூட்டத்தில் ரெப்போ வட்டி 6.25% ஆக உயர்த்தப்பட்டது. கடந்த ஆண்டு மே மாதம் முதல் ரிசர்வ் வங்கி ரெப்போ வட்டியை உயர்த்தி வருவது குறிப்பிடத்தக்கது.

கடந்த நவம்பர், டிசம்பர் மாதங்களில் சில்லறை பணவீக்கம் குறைந்துள்ளது. நவம்பரில் சில்லறை பணவீக்கம் 5.88% ஆகவும், டிசம்பரில் பணவீக்கம் 5.72% ஆகவும் குறைந்துள்ளது.

பணவீக்கம் குறைந்துள்ளதால், இன்று தொடங்கியுள்ள ரிசர்வ் வங்கி கொள்கை கூட்டத்தில் ரெப்போ வட்டி விகிதத்தில் எந்த மாற்றமும் செய்யப்படாது என எதிர்பார்க்கப்படுகிறது. ரிசர்வ் வங்கியின் வரம்புக்குள் பணவீக்கம் வந்துவிட்டதால் வட்டி விகிதம் உய்ர்த்தப்படாது என நிபுணர்கள் கருதுகின்றனர்.

மேற்கூறியபடி, ரிசர்வ் வங்கியின் கொள்கை கூட்டத்தில் ரெப்போ வட்டி விகிதம் மாற்றப்படாமல் விடப்பட்டால், கடனாளிகளுக்கு EMI தொகையில் எந்த மாற்றமும் இருக்காது.