இன்சூரன்ஸ் பணம் வருதா இல்லையா? மத்திய அரசு அறிக்கை வெளியீடு!

மக்களவையின் இன்றைய கேள்வி நேரத்தின்போது, சாலை விபத்துகளில் பாதிக்கப்படும் மக்களுக்கு காப்பீட்டு நிறுவனங்கள் சரியான அளவில் காப்பீட்டுப் பணத்தை வழங்குகின்றனவா? எவ்வளவு காலத்தில் இந்தப் பணம் கையில் கிடைக்கிறது போன்ற பல்வேறு கேள்விகள் கேட்கப்பட்டது. அதற்கு மத்திய நிதியமைச்சர் நிர்மலா சீதாராமன் பதிலளித்தார். அதில் அரசு மற்றும் தனியார் காப்பீட்டு நிறுவனங்கள் எவ்வளவு பணம் வழங்கியுள்ளன என்ற பட்டியலும் விரிவாக வெளியிடப்பட்டது.

மோட்டார் வாகனச் சட்டம் 1988இன் படி, விபத்து நடைபெற்றது தெரிந்தவுடன் அதற்கான காப்பீடு வழங்குவது தொடர்பான சம்பந்தப்பட்ட காப்பீட்டு நிறுவனம் சிறப்பு அதிகாரி ஒருவரை நியமிக்கும். அவர் இன்சூரன்ஸ் செட்டில்மெண்ட் வழங்குவது குறித்து சம்பந்தப்பட்ட நபரிடம் பேசுவார். அதற்கு ஒப்புதல் கிடைத்தவுடன் கிளைம் செய்த 30 நாட்களுக்குள் காப்பீட்டுப் பணம் வழங்கப்படும். மூன்றாம் தரப்பு காப்பீட்டுக்கு பாதிக்கப்பட்டவர்களின் கிளைம் அடிப்படையில் அதிகபட்சமாக நேஷனல் இன்சூரன்ஸ் கம்பெனி லிமிடெட் நிறுவனத்தில் மொத்தம் 1.05 லட்சம் கிளைம் செய்யப்பட்டுள்ளது. (2020-21 நிதியாண்டில்)


அதைத் தொடர்ந்து தி நியூ அஸ்யூரன்ஸ் கம்பெனி லிமிடெட் நிறுவனத்தில் 59,267 கிளைம்களும், யுனைட்டெட் இன்சூரன்ஸ் கம்பெனி லிமிடெட் நிறுவனத்தில் 48,093 கிளைம்களும் பதிவாகியுள்ளன. குறைந்தபட்சமாக எடில்வைஸ் ஜெனரல் இன்சூரன்ஸ் கம்பெனியில் மொத்தம் 104 கிளைம்கள் மட்டுமே விண்ணப்பிக்கப்பட்டுள்ளன. அதேபோல, சமீப நாட்களில் மிகவும் பிரபலமான அக்கோ ஜெனரல் இன்சூரன்ஸ் கம்பெனியில் 334 கிளைம்கள் மட்டுமே இந்த நிதியாண்டில் பதிவாகியுள்ளன.

மாநில வாரியாகப் பார்த்தால் தமிழகத்தில் மொத்தம் 48,036 கிளைம்கள் மட்டுமே இந்த நிதியாண்டில் விண்ணப்பிக்கப்பட்டுள்ளது. அதிகபட்சமாக கேரளாவில்தான் 52,301 கிளைம்களுக்கு விண்ணப்பித்துள்ளனர். குறைந்தபட்சமாக லட்சத்தீவுகளில் 3 கிளைம்கள் மட்டுமே வந்துள்ளது.

வழங்கப்பட்ட இன்சூரன்ஸ் தொகையைப் பொறுத்தவரையில், 2020-21 நிதியாண்டில் அக்கோ ஜெனரல் இன்சூரன்ஸ் கம்பெனி மொத்தம் ரூ.24,66,373 வழங்கியுள்ளது. பஜாஜ் ஆலியன்ஸ் ஜெனரல் இன்சூரன்ஸ் கம்பெனி ரூ.2.05 கோடியும், சோழமண்டலம் ஜெனரல் இன்சூரன்ஸ் கம்பெனி ரூ.1.16 கோடியும், ஃபியூச்சர் ஜெனரல் இந்தியா இன்சூரன்ஸ் கம்பெனி ரூ.1.81 கோடியும், கோ டிஜிட் இன்சூரன்ஸ் கம்பெனி ரூ.50.82 லட்சமும், ஐசிஐசிஐ லம்பார்டு இன்சூரன்ஸ் கம்பெனி ரூ.3.28 கோடியும், கொடாக் மகிந்திரா ஜெனரல் இன்சூரன்ஸ் கம்பெனி ரூ.43.70 லட்சமும் வழங்கியுள்ளன. எல்&டி ஜெனரல் இன்சூரன்ஸ் கம்பெனி இந்த நிதியாண்டில் எதுவும் வழங்கவில்லை.