பீட்சாவின் தாய் நாட்டிலேயே வியாபாரம் இல்லை.. கடையை காலி செய்த டோமினோஸ்

Domino’s Pizza Italy : பீட்சாவின் தாய் நாடான இத்தாலியில் இருந்து பிரபல பீட்சா நிறுவனமான டோமினோஸ் முழுவதுமாக வெளியேறியுள்ளது.

அமெரிக்காவை சேர்ந்த டோமினோஸ் பீட்சா (Domino's Pizza) நிறுவனம் உலகிலேயே மிகப்பெரிய பீட்சா உணவக நிறுவனமாகும். இந்நிறுவனத்தின் ஆண்டு வருவாய் மட்டும் 12.3 பில்லியன் டாலர் ஆகும். இந்தியா உள்பட பல நாடுகளில் டோமினோஸ் பீட்சா உணவகங்கள் செயல்பட்டு வருகின்றன.

இருப்பினும், பீட்சாவின் தாய் நாடான இத்தாலியில் டோமினோஸ் பீட்சா நிறுவனத்தால் வளரவே முடியவில்லை. கடைசியில் கொஞ்சம் கொஞ்சமாக உணவகங்களை மூடி ஒட்டுமொத்தமாக இத்தாலியை விட்டே டோமினோஸ் பீட்சா நிறுவனம் வெளியேறிவிட்டது.

உலக மக்களை தன் சுவையால் கட்டி போட்டுள்ள பீட்சாவுக்கு இத்தாலி நாடுதான் தாயகம். இத்தாலியில் டோமினோஸ் நிறுவனம் 2015ஆம் ஆண்டில் நுழைந்தது. இத்தாலியில் 880 உணவகங்களை திறக்க டோமினோஸ் அப்போதே முடிவு செய்தது. ஆனால், அதிகபட்சமாக 29 உணவகங்களை மட்டுமே டோமினோஸ் திறந்தது.

ஆனால், எதிர்பார்ப்புக்கு மாறாக டோமினோஸ் பீட்சாவுக்கு இத்தாலியில் வரவேற்பு கிடைக்கவில்லை. இதனால் இத்தாலியில் டோமினோஸ் நிறுவனம் தனது உணவகங்களின் எண்ணிக்கையை படிப்படியாக குறைத்துக்கொண்டே வந்தது.

கடைசியாக ரோம் மற்றும் மிலன் ஆகிய நகரங்களில் மட்டும் டோமினோஸ் பீட்சா உணவகங்கள் செயல்பட்டு வந்தன. இந்த கடைசி உணவகங்களையும் கூட சில மாதங்களுக்கு முன் டோமினோஸ் நிறுவனம் மூடிவிட்டது. இறுதியாக, டோமினோஸ் இத்தாலி நிறுவனத்தின் இணையதளமும் நேற்றுடன் (மார்ச் 23) முடங்கிவிட்டது.

இந்த சூழலில், ஆரம்பகட்ட முதலீடுகளையாவது மீட்டுவிடலாம் என்ற நம்பிக்கையில் இத்தாலியில் உள்ள தனது சொத்துகளை விற்பனை செய்ய டோமினோஸ் பீட்சா நிறுவனம் முயற்சித்து வருகிறது.