இந்தியாவுக்கு சாப விமோசனமே கிடையாது... ஆய்வில் எச்சரிக்கை!

2018ஆம் ஆண்டிலிருந்தே இந்தியாவில் பொருளாதார மந்தநிலை என்ற பிரச்சினை பூதாகரமாக எழுந்துள்ளது. தனியார் முதலீடுகளில் சரிவு, உற்பத்தித் துறையில் மந்தநிலை, மக்களிடையே தேவை குறைவு போன்ற பல்வேறு காரணிகள் பொருளாதார மந்தநிலையுடன் சேர்த்து மத்திய அரசுக்குப் பெரும் நெருக்கடியை ஏற்படுத்தியுள்ளன. ஆட்டோமொபைல் துறையில் சறுக்கல், வேலையின்மை பிரச்சினை போன்றவையும் விமர்சனத்துக்கு உள்ளாகின. நடப்பு நிதியாண்டின் ஏப்ரல் - ஜூன் காலாண்டில் 5 சதவீதமாகவும், ஜூலை - செப்டம்பர் காலாண்டில் 4.5 சதவீதமாகவும் பொருளாதார வளர்ச்சி சரிந்தது.

இந்த ஆண்டின் அக்டோபர் - டிசம்பர் காலாண்டிலும், ஜனவரி - மார்ச் காலாண்டிலும் பொருளாதார மந்தநிலை தொடரும் என்று சர்வதேச நாணய நிதியம், உலக வங்கி உள்ளிட்ட அமைப்புகள் எச்சரித்துள்ளன. 2019-20 நிதியாண்டில் 5 சதவீத வளர்ச்சியை அடைவதே கடினம் என்று கூறப்பட்டுள்ளது. இதுபோன்ற சூழலில் அடுத்த 2020-21 நிதியாண்டிலும் பொருளாதார மந்தநிலை இருக்கும் என்று இந்தியா ரேட்டிங்ஸ் நிறுவனம் தனது ஆய்வில் தெரிவித்துள்ளது. 2019-20 நிதியாண்டில் 5 சதவீத வளர்ச்சியையும், 2020-21 நிதியாண்டில் 5.5 சதவீத வளர்ச்சியையும் இந்தியா கொண்டிருக்கும் என்று இந்தியா ரேட்டிங்ஸ் மதிப்பிட்டுள்ளது.

வங்கிக் கடன்கள் சரிவு, குடும்பங்களின் வருமானம் குறைவு போன்றவை பொருளாதார மந்தநிலைக்குக் காரணமாகக் கூறப்பட்டுள்ளது. நடப்பு நிதியாண்டில் நிதிப் பற்றாக்குறையை 3.3 சதவீதத்திலேயே வைத்திருக்க மத்திய அரசு இலக்கு நிர்ணயம் செய்துள்ளது. ஆனால், அரசின் வரி வருவாய் குறைந்து செலவுகள் அதிகரித்துள்ளதால் மொத்த உள்நாட்டு உற்பத்தியில் நிதிப் பற்றாக்குறையின் அளவு 3.6 சதவீதமாக உயரும் என்று இந்தியா ரேட்டிங்ஸ் கூறியுள்ளது. பிப்ரவரி 1ஆம் தேதி மத்திய பட்ஜெட் தாக்கல் செய்யப்படவிருக்கும் நிலையில், பொருளாதார வளர்ச்சியை மீட்டெடுப்பதற்கான முக்கிய அறிவிப்புகள் இடம்பெறும் என்று எதிர்பார்க்கப்படுகிறது.

பணவீக்கத்தைப் பொறுத்தவரையில், 2020-21 நிதியாண்டில் சில்லறைப் பணவீக்கம் 3.9 சதவீதமாகவும், மொத்த விற்பனை விலைப் பணவீக்கம் 1.3 சதவீதமாகவும் இருக்கும் என்று இந்தியா ரேட்டிங்ஸ் நிறுவனம் தனது ஆய்வில் தெரிவித்துள்ளது.