பொருளாதார மந்தநிலை: அதிர்ச்சியளிக்கும் தகவல்!

2014ஆம் ஆண்டில் நரேந்திர மோடி அரசு ஆட்சிப் பொறுப்பேற்ற பிறகிலிருந்தே நாட்டில் போதிய அளவிலான வேலைவாய்ப்புகள் உருவாக்கப்படுவதில்லை என்றும், பொருளாதார வளர்ச்சி வீழ்ச்சிப் பாதையில் சென்றுகொண்டிருப்பதாகவும் விமர்சிக்கப்பட்டு வருகிறது. குறிப்பாக, 2019ஆம் ஆண்டின் தொடக்கத்திலிருந்தே நாட்டின் வளர்ச்சி பின்னோக்கிச் சென்றுகொண்டிருக்கிறது. 2019-20 நிதியாண்டின் ஏப்ரல் - ஜூன் காலாண்டில் 5 சதவீதமாகவும், ஜூலை - செப்டம்பர் காலாண்டில் அதைவிட மோசமாக 4.5 சதவீதமாகவும் பொருளாதார வளர்ச்சி வீழ்ந்தது. இந்த ஆண்டின் எஞ்சிய காலாண்டுகளிலும் வளர்ச்சி மந்தமாகவே இருக்கும் என்று சர்வதேச ஆய்வு நிறுவனங்கள் மதிப்பிட்டுள்ளன.

மத்திய புள்ளியியல் அலுவலகம் தற்போது வெளியிட்டுள்ள முதல் முன்கூட்டிய மதிப்பீட்டு அறிக்கையின்படி, 2019-20 நிதியாண்டில் இந்தியாவின் உற்பத்தித் துறை 2 சதவீத வீழ்ச்சியைச் சந்திக்கவுள்ளது. 2018-19 நிதியாண்டில் இத்துறையின் வளர்ச்சி 6.9 சதவீதமாக இருந்தது. அதேபோல, இந்த ஆண்டில் கட்டுமானத் துறையின் வளர்ச்சி வெறும் 3.2 சதவீதமாக மட்டுமே இருக்கும் என்று மதிப்பிடப்பட்டுள்ளது. 2018-19ஆம் ஆண்டில் இதன் வளர்ச்சி 8.7 சதவீதமாக இருந்தது. ஒட்டுமொத்தமாக நடப்பு நிதியாண்டில் இந்தியப் பொருளாதார வளர்ச்சி 5 சதவீதமாக மட்டுமே இருக்கும் என்று தெரியவந்துள்ளது.

இதற்கு முன்னர் கடைசியாக 2008-09 நிதியாண்டில் இந்தியப் பொருளாதாரம் மிக மோசமாக 3.1 சதவீத வளர்ச்சியைப் பதிவுசெய்திருந்தது. அதன் பின்னர் இந்த ஆண்டில்தான் மந்தமான வளர்ச்சி ஏற்படவுள்ளது. இந்த ஆண்டின் முதல் காலாண்டில் இந்தியாவின் மொத்த உள்நாட்டு உற்பத்தி வளர்ச்சி 5 சதவீதமாக இருந்த நிலையில், அதைத் தொடர்ந்த மூன்று காலாண்டுகளிலும் 4.5 சதவீத வளர்ச்சி மட்டுமே மதிப்பிடப்பட்டுள்ளது. முன்னதாக ரிசர்வ் வங்கி வெளியிட்டிருந்த ஆய்வறிக்கையிலும், இந்த ஆண்டில் இந்தியா 5 சதவீத வளர்ச்சியை மட்டுமே கொண்டிருக்கும் என்று தெரிவித்திருந்தது.

பொருளாதார வளர்ச்சி மந்தமாக இருக்கும் என்று மதிப்பிடப்பட்டுள்ள நிலையில், மத்திய அரசு தனது செலவுகளைக் குறைத்து வருவது ஆபத்தை ஏற்படுத்தலாம் என்று இக்ரா நிறுவனம் எச்சரித்துள்ளது. இந்தியர்களின் தனிநபர் வருமானத்தைப் பொறுத்தவரையில், இந்த ஆண்டில் ரூ.1,35,050 ஆக இருக்கும் என்று மத்திய புள்ளியியல் அலுவலகம் மதிப்பிட்டுள்ளது. இது 2018-19ஆம் ஆண்டில் இருந்த ரூ.1,26,406 வருவாயை விட 6.8 சதவீதம் அதிகமாகும்.