300 ஊழியர்களுக்கு டாட்டா காட்டிய ஸ்டார்ட் அப் நிறுவனம்!

அண்மைகாலமாக பல்வேறு ஸ்டார்ட் அப் நிறுவனங்கள் தங்கள் ஊழியர்களை வெளியேற்றி வருகின்றன. குறிப்பாக பல்வேறு கல்வித் துறை ஸ்டார்ட் அப் (EdTech) நிறுவனங்கள் தொடர்ந்து ஊழியர்களை வெளியேற்றி வருகின்றன.

இந்த வரிசையில் தற்போது பைஜுஸ் (BYJU's) நிறுவனத்துக்கு சொந்தமான வொய்ட்ஹேட் ஜேஆர் (WhiteHat Jr) நிறுவனம் சுமார் 300 ஊழியர்களை நீக்கியுள்ளது. இந்நிறுவனம் நஷ்டத்தில் இயங்கி வரும் நிலையில், செலவுகளை குறைப்பதற்காக ஊழியர்களை நீக்கியுள்ளதாக தெரிகிறது.

வொய்ட்ஹேட் ஜேஆர் நிறுவனம் இளைஞர்களுக்கு கோடிங் கற்றுத்தரும் தொழில் செய்து வந்தது. இந்நிறுவனத்துக்கு 2020 ஆகஸ்ட் மாதம் பைஜுஸ் நிறுவனம் 300 மில்லியன் டாலர் வழங்கியது. ஆனால் வொய்ட்ஹேட் ஜேஆர் தொடர்ந்து நஷ்டத்தில் இயங்கி வந்தது.

Progcap: இந்திய ஸ்டார்ட் அப் நிறுவனத்தில் கூகுள் முதலீடு!
2021ஆம் நிதியாண்டில் வொய்ட்ஹேட் ஜேஆர் நிறுவனம் 1,690 கோடி ரூபாய் நஷ்டம் அடைந்ததாக தெரிவித்துள்ளது. அந்த ஆண்டில் வொய்ட்ஹேட் ஜேஆர் நிறுவனத்தின் வருவாய் 483.9 கோடி ரூபாய். ஆனால் செலவுகளோ 2175.2 கோடி ரூபாய்.

இந்நிலையில், செலவுகளை குறைப்பதற்காக வொய்ட்ஹேட் ஜேஆர் நிறுவனம் 300 ஊழியர்களை நீக்கியுள்ளதாக தகவல் வெளியாகியுள்ளது. நீக்கப்பட்ட ஊழியர்களுக்கு ஒரு மாத சம்பளத் தொகை மட்டும் இழப்பீடாக வழங்கப்படும் எனவும் தகவல் வெளியாகியுள்ளது.

ஏற்கெனவே அனகாடமி, லிடோ லேர்னிங், வேதாந்து உள்ளிட்ட கல்வி ஸ்டார்ட் அப் நிறுவனங்கள் அண்மையில் தங்கள் ஊழியர்களை நீக்கியது குறிப்பிடத்தக்கது.